اسلام آباد:وزیر اعظم میاں محمد نواز شریف نے کہا ہے کہ آپریشن ضرب عضب کے ذریعے قانون نافذ کرنے میں پاک فضائیہ کا کلیدی کردار ہے۔ ان خیالات کا اظہار انہوں نے پاک فضائیہ کے ہیڈ کوارٹر کے دورہ کے موقع پر اپنے تحریری تاثرات میں کیا۔ وزیر اعظم میاں محمد نواز شریف نے جمعرات کو پاک فضائیہ کے ہیڈکواٹر کا دورہ کیا۔ جہاں انہیں پاک فضائیہ کی آپریشنل تیاریوں اور آپریشن ضرب عضب میں فضائیہ کی کار گردگی پر بریفنگ دی گئی۔ پاک فضائیہ کے سربراہ ائیر مارشل طاہر رفیق بٹ نے وزیر اعظم نواز شریف کا استقبال کیا جبکہ فضائیہ کے چاک و چوبند دستے نے سلامی دی۔ اس موقع پر وزیر اعظم نے یادگار شہدا پر پھول چڑھائے اور گارڈآف آنر کا معائنہ کیا۔ وزیر اعظم نے پاک فضائیہ کے سربراہ سے ملاقات بھی کی جس میں ملک کو درپیش اندرونی اور بیرونی سیکورٹی صورتحال پر تبادلہ خیال کیا گیا جبکہ انہیں پاک فضائیہ کی آپریشنل تیاریوں مستقل ترقیاتی منصوبوں اور آپریشن ضرب عضب میں پاک فضائیہ کی کارکردگی کے حوالے سے بریفنگ دی گئی۔