اسلام آباد (نیوز ڈٰیسک)برطانیہ میں خدمات انجام دینے والے معروف ماہر امراضِ قلب ڈاکٹر حسنات خان اب پاکستان منتقل ہو گئے ہیں،

جہاں انہیں جناح انسٹی ٹیوٹ آف کارڈیالوجی کا سربراہ مقرر کیا گیا ہے۔ وہ اس ادارے میں سی ای او اور ڈین کے طور پر ذمہ داریاں سنبھالیں گے۔ڈاکٹر حسنات خان کو ماضی میں برطانیہ کی شہزادی لیڈی ڈیانا نے “مسٹر ونڈرفل” کا لقب دیا تھا۔ چیئرمین وزیر اعلیٰ پنجاب ایڈوائزری کمیٹی برائے امراض قلب ڈاکٹر فرقد عالمگیر کے مطابق، ان کا انتخاب باقاعدہ انٹرویو کے عمل کے بعد کیا گیا، اور وہ خود بھی پاکستان میں خدمات انجام دینے کے خواہاں تھے۔صوبائی وزیر صحت (سپیشلائزڈ) خواجہ سلمان رفیق کا کہنا ہے کہ ڈاکٹر حسنات ایک ماہر اور تجربہ کار کارڈیک سرجن ہیں، جن کی آمد سے اسپتال کی کارکردگی میں نمایاں بہتری آئے گی۔ انہوں نے مزید کہا کہ کارڈیک سرجری کو عالمی معیار کے مطابق استوار کیا جائے گا تاکہ مریضوں کو بہتر سہولیات فراہم کی جا سکیں۔ڈاکٹر حسنات خان 1958 میں جہلم میں پیدا ہوئے۔

انہوں نے کنگ ایڈورڈ میڈیکل کالج سے تعلیم حاصل کی اور بعد ازاں برطانیہ چلے گئے، جہاں انہوں نے رائل برومپٹن اسپتال میں بطور کارڈیالوجسٹ خدمات انجام دیں۔ 1995 میں اسی اسپتال میں ان کی ملاقات لیڈی ڈیانا سے ہوئی، جو اپنے ایک زیر علاج دوست کی عیادت کے لیے آئی تھیں، اور یہی تعلق بعد میں ان کی شہرت کا باعث بنا۔کئی سال بیرون ملک خدمات سرانجام دینے کے بعد اب ڈاکٹر حسنات خان وطن واپس آ کر ملکی صحت کے شعبے میں اپنا کردار ادا کریں گے۔