اسلام آباد(نیوز ڈ یسک)ہالی وڈ کے معروف اداکار اور ہدایت کار رابرٹ راب رینر اور ان کی اہلیہ مِشل سینگر رینر دو روز قبل لاس اینجلس میں اپنے گھر سے مردہ حالت میں ملے، جس نے فلمی دنیا کو صدمے میں مبتلا کر دیا ہے۔بین الاقوامی میڈیا رپورٹس کے مطابق دونوں کی لاشوں پر چاقو کے متعدد وار کے گہرے نشانات پائے گئے، جن سے مسلسل خون بہنے کے باعث ان کی موت ہوئی۔

ابتدا میں شبہ تھا کہ شاید دونوں کو کسی نامعلوم چور نے گھر میں گھس کر قتل کیا ہے۔تاہم تازہ پیشرفت میں پولیس نے جوڑے کے 32 سالہ بیٹے نِک رینر کو حراست میں لے لیا ہے۔ تفتیش کاروں کے مطابق اس سے پوچھ گچھ جاری ہے، لیکن ابھی تک اس کے خلاف کوئی باضابطہ الزام عائد نہیں کیا گیا۔ پولیس کا کہنا ہے کہ اس سفاکانہ قتل کی تحقیقات تیزی سے جاری ہیں اور مزید حقائق جلد سامنے آئیں گے۔ اب تک کیس میں کوئی دوسرا مشتبہ سامنے نہیں آیا۔یہ بھی بتایا گیا ہے کہ نِک رینر خود بھی فلم سازی اور فوٹوگرافی سے جڑے ہوئے ہیں، تاہم وہ کئی عرصے سے منشیات کے استعمال اور بے گھری کے مسائل کا شکار چلے آ رہے ہیں۔ 2015 میں وہ اپنی اسی جدوجہد پر مبنی فلم Being Charlie میں بھی جلوہ گر ہوئے تھے۔

مرحوم رابرٹ راب رینر کے خاندان نے اس المناک واقعے کو ناقابلِ برداشت نقصان قرار دیتے ہوئے عوام سے گزارش کی ہے کہ اس مشکل گھڑی میں ان کی پرائیویسی کا احترام کیا جائے۔واضح رہے کہ رابرٹ رینر ایک با اثر فلم ساز اور اداکار تھے جنہوں نے متعدد کلاسک فلموں اور ٹی وی پراجیکٹس کے ذریعے عالمی شہرت حاصل کی۔