بالی وڈ کے مشہور اور لیجنڈری اداکار دھرمیندر 89 سال کی عمر میں انتقال کر گئے۔ بھارتی میڈیا کے مطابق، دھرمیندر نے پیر کے روز ممبئی میں اپنے گھر پر آخری سانس لی۔ ان کے گھر کے باہر متعدد بالی وڈ شخصیات اور اہلخانہ سفید لباس میں موجود دکھائی دیے۔
اطلاعات کے مطابق، کچھ دن قبل ہی دھرمیندر ممبئی کے بریچ کینڈی اسپتال میں داخل بھی رہے تھے۔ معروف فلم ساز کرن جوہر نے بھی انسٹاگرام پر ان کے انتقال کی تصدیق کی اور انہیں خراجِ تحسین پیش کیا۔رپورٹس کے مطابق، دھرمیندر کو دو ہفتے قبل سانس لینے میں مشکلات کی وجہ سے اسپتال منتقل کیا گیا تھا، جبکہ رواں سال اپریل میں ان کی آنکھ کی سرجری بھی ہوئی تھی۔ ان کی آخری اداکاری ان کی فلم ‘اکیس’ میں دیکھی جا سکتی ہے، جو 25 دسمبر کو ریلیز ہوگی۔
دھرمیندر نے اپنے کیریئر کا آغاز 1960 میں فلم ‘دل بھی تیرا ہم بھی تیرے’ سے کیا۔ ان کی فلموں میں ‘شعلے’، ‘یادوں کی بارات’، ‘میرا گاوں میرا دیش’، ‘نوکر بیوی کا’ اور ‘پھول اور پتلی’ شامل ہیں، جو آج بھی یاد کی جاتی ہیں۔ 2012 میں حکومت ہند نے انہیں پدم بھوشن سے نوازا۔دھرمیندر کا اصل نام دھرمیندر کیول کرشن دیول تھا اور وہ پنجاب کے لدھیانہ کے ایک گاؤں سے تعلق رکھتے تھے۔ ابتدائی زندگی میں ہی ان کی شادی پرکاش کور سے ہوئی، بعد ازاں انہوں نے اداکارہ ہیما مالنی سے شادی کی۔
89 سال کی عمر میں بھی دھرمیندر سوشل میڈیا پر سرگرم رہے اور اکثر اپنے مداحوں کے ساتھ صحت مند زندگی اور کاشتکاری کے مشورے شیئر کرتے رہے۔ انسٹاگرام پر ان کی پوسٹس میں انہیں فارم کی دیکھ بھال کرتے، ٹریکٹر چلتے، اور سادہ زندگی کے اسباق دیتے ہوئے دیکھا جا سکتا تھا۔
