اسلام آباد (نیوز ڈیسک)ٹک ٹاک نے اپنے صارفین کے لیے کمائی کے مزید مواقع پیدا کر دیے ہیں، اب ویڈیو شیئرنگ ایپ کے ذریعے کریئیٹرز پہلے سے زیادہ آمدنی حاصل کر سکیں گے۔کمپنی نے امریکا میں ہونے والی ایک کانفرنس میں اعلان کیا کہ ٹک ٹاک کے سبسکرپشن ماڈل میں اہم تبدیلی کی جا رہی ہے، جس کے بعد صارفین سبسکرپشنز سے حاصل ہونے والی آمدنی کا 90 فیصد حصہ حاصل کر سکیں گے۔

اس وقت تک یہ حصہ 70 فیصد تھا، تاہم نئی پالیسی کے تحت کریئیٹرز کی کمائی میں 20 فیصد تک اضافہ ہوگا۔ٹک ٹاک کے مطابق اس سہولت سے فائدہ اٹھانے کے لیے کچھ شرائط پوری کرنا ضروری ہوں گی، جن میں کم از کم 10 ہزار فالوورز، گزشتہ مہینے میں ویڈیوز کے ایک لاکھ ویوز، اور کم از کم 3 سبسکرپشن اونلی ویڈیوز پوسٹ کرنا شامل ہے۔کمپنی نے اپنے بیان میں کہا کہ “جتنا زیادہ آپ تسلسل سے مواد تخلیق کریں گے، اتنی ہی زیادہ آپ کی کمائی بڑھے گی۔”بیان میں مزید بتایا گیا کہ سبسکرپشن فیچر کریئیٹرز کو اپنی کمیونٹی مضبوط کرنے کا موقع دیتا ہے، جبکہ فالوورز کو خصوصی مراعات جیسے اسپیشل بیجز، سبسکرائبرز کے لیے مخصوص پوسٹس، چیٹ آپشنز اور دیگر فیچرز تک رسائی حاصل ہوتی ہے۔

ابتدائی طور پر اس نئی پالیسی کا اطلاق امریکا اور کینیڈا میں کیا جا رہا ہے، تاہم کمپنی کا کہنا ہے کہ آئندہ چند مہینوں میں اسے دوسرے ممالک تک بھی پھیلایا جائے گا۔بین الاقوامی سطح پر، جہاں فی الحال سبسکرپشن آمدنی کا 50 فیصد حصہ صارفین کو دیا جاتا ہے، وہاں بھی اسے بڑھا کر 70 فیصد تک کر دیا جائے گا۔یاد رہے کہ ٹک ٹاک پر سبسکرپشن پروگرام کے تحت صارفین اپنے پسندیدہ کریئیٹرز کے خصوصی مواد، اسٹیکرز اور چینلز تک رسائی حاصل کرنے کے لیے ماہانہ فیس ادا کرتے ہیں۔