اسلام آباد (نیوز ڈیسک) بھارت کے معروف اداکار ستیش شاہ 74 برس کی عمر میں انتقال کر گئے۔بھارتی میڈیا کے مطابق ستیش شاہ طویل عرصے سے گردوں کی بیماری میں مبتلا تھے اور ممبئی کے ایک مقامی اسپتال میں زیرِ علاج تھے، جہاں وہ دورانِ علاج چل بسے۔رپورٹس میں بتایا گیا ہے کہ اداکار کی آخری رسومات کل ممبئی میں انجام دی جائیں گی، جن میں فلم انڈسٹری سے تعلق رکھنے والی کئی شخصیات کی شرکت متوقع ہے۔

ستیش شاہ نے اپنے فنی سفر کا آغاز 1970 کی دہائی میں کیا اور کئی کامیاب فلموں میں اپنی منفرد اداکاری کے باعث ناظرین کے دل جیتے۔ ان کی 1983 کی فلم “جانے بھی دو یارو” نے انہیں شہرت کی بلندیوں پر پہنچا دیا اور وہ بعد میں متعدد یادگار کرداروں کے ذریعے فلمی دنیا میں اپنی پہچان قائم کرنے میں کامیاب ہوئے۔وہ ان چند فنکاروں میں شامل تھے جنہوں نے بالی وڈ کے تمام بڑے اسٹارز—امیتابھ بچن، شاہ رخ خان، سلمان خان اور عامر خان—کے ساتھ اسکرین شیئر کی۔ستیش شاہ نے ٹی وی انڈسٹری میں بھی شاندار کارکردگی دکھائی۔ مشہور ڈرامہ سیریل “یہ جو ہے زندگی” میں انہوں نے 55 اقساط میں 55 مختلف کردار ادا کیے، جو ان کی فنی صلاحیتوں کا منہ بولتا ثبوت ہیں۔ان کے انتقال پر بھارتی فلم اور ٹی وی انڈسٹری میں گہرے دکھ اور افسوس کا اظہار کیا جا رہا ہے۔