اسلام آبا د (نیوز ڈیسک) بھارتی میڈیا رپورٹس کے مطابق معروف ٹیکنالوجی ماہر اور ہاٹ میل کے بانی صابر بھاٹیا سے متعلق انکشاف سامنے آیا ہے کہ انہوں نے ماضی میں بالی ووڈ اداکارہ ایشوریا رائے سے شادی کی خواہش ظاہر کی تھی، جس کے نتیجے میں ان کی ملاقات اداکار سلمان خان سے ایک غیر متوقع اور دلچسپ انداز میں ہوئی۔اطلاعات کے مطابق یہ واقعہ 2001 میں ایک اعلیٰ سطحی تقریب کے دوران پیش آیا، جہاں صابر بھاٹیا اپنی دوست اور ٹی وی میزبان سمی گریوال کے ہمراہ موجود تھے۔

اسی تقریب میں سلمان خان بھی شریک تھے، جو اس وقت ایشوریا رائے کے ساتھ اپنے تعلقات کی وجہ سے خبروں کی زینت بنے ہوئے تھے۔ملاقات کے دوران سلمان خان نے ہلکے پھلکے انداز میں صابر بھاٹیا سے پوچھا،“تو تم وہ شخص ہو جو ایش سے شادی کرنا چاہتا ہے؟”جس پر صابر بھاٹیا نے مسکرا کر اس بات کو محض ایک افواہ قرار دیا۔ اس پر سلمان نے جواب دیا، “وہ بہت اچھی لڑکی ہے۔”رپورٹس کے مطابق محفل کے دوران ایک موقع پر سلمان خان کی جلتی سگریٹ حادثاتی طور پر صابر بھاٹیا کے ہاتھ کو چھو گئی، جس پر سلمان نے مذاق میں کہا، “آخر تمہارے ہاتھوں پر راکھ آ ہی گئی!”یاد رہے کہ سلمان خان اور ایشوریا رائے کے درمیان تعلقات بعد میں ختم ہوگئے، جبکہ صابر بھاٹیا نے 2008 میں تانیہ شرما سے شادی کی، جو 2013 میں طلاق پر منتج ہوئی۔قابلِ ذکر ہے کہ صابر بھاٹیا نے 1996 میں ہاٹ میل کے نام سے دنیا کی پہلی ویب بیسڈ ای میل سروس متعارف کروائی تھی، جسے ایک سال بعد مائیکروسافٹ نے 400 ملین ڈالر کے عوض خرید لیا تھا۔