اسلام آبا د (نیوز ڈیسک ) پاکستانی شوبز انڈسٹری کے معروف اداکار نسیم وکی نے اسٹیج ڈراموں میں کام کرنے والے فنکاروں کی زندگیوں سے جڑی افسوسناک حقیقت کا انکشاف کیا ہے۔
ایک پوڈکاسٹ انٹرویو میں گفتگو کرتے ہوئے انہوں نے تین دہائیوں پر محیط اپنے فنی سفر کی روشنی میں اسٹیج ڈانسرز اور اداکاروں کے پس منظر سے متعلق چند تلخ حقائق بیان کیے۔
نسیم وکی کا کہنا تھا کہ ’’عوام صرف اسٹیج پر نظر آنے والے رقص اور فحاشی پر تنقید کرتی ہے، مگر ان فنکاروں کی مجبوریوں، غربت اور دکھوں کو کوئی نہیں سمجھتا۔‘‘
انہوں نے بتایا کہ اسٹیج پر کام کرنے والے زیادہ تر فنکار اور ڈانسرز غریب طبقے سے تعلق رکھتے ہیں، جن میں سے کئی اپنے بیمار والدین یا خاندان کے مالی بوجھ کی وجہ سے یہ پیشہ اختیار کرنے پر مجبور ہوتے ہیں۔
اداکار نے افسوس کا اظہار کرتے ہوئے کہا، ’’کوئی بھی لڑکی محض شوق میں اسٹیج پر رقص نہیں کرتی، بلکہ اکثر اوقات وہ شدید مجبوریوں کے باعث یہ راستہ اختیار کرتی ہے۔‘‘
نسیم وکی نے واضح کیا کہ وہ فحاشی یا غیر اخلاقی مواد کے حامی نہیں ہیں، مگر ان کے نزدیک ’’غربت اور حالات کی تنگی ہی وہ بڑی وجہ ہے جو فنکاروں کو ان اسٹیجوں تک لے آتی ہے۔‘‘
انہوں نے ایک ذاتی انکشاف کرتے ہوئے بتایا کہ ’’میری بیوی بھی شادی سے پہلے اسٹیج آرٹسٹ تھیں، مگر شادی کے بعد میں نے انہیں یہ پیشہ چھوڑنے کا مشورہ دیا۔‘‘
اداکار نے مزید کہا کہ انہوں نے کبھی کسی خاتون فنکارہ کو بطور نیا چہرہ متعارف نہیں کرایا، کیونکہ وہ جانتے ہیں کہ اس میدان میں خواتین کو کس طرح کے دباؤ اور استحصال کا سامنا کرنا پڑتا ہے۔
ان کا کہنا تھا، ’’میں ہمیشہ خواتین کو یہ مشورہ دیتا ہوں کہ وہ کسی ایسے پیشے کا انتخاب کریں جو انہیں عزت، وقار اور تحفظ فراہم کرے۔‘‘
