اسلام آباد (نیوز ڈیسک)ٹک ٹاکر سامعہ حجاب نے اپنے تازہ بیان میں گرفتار ملزم حسن زاہد کے ساتھ تعلقات کی تصدیق کرتے ہوئے کہا ہے کہ وہ ان کا منگیتر تھا، تاہم اصل حقیقت سامنے آنے پر انہوں نے یہ رشتہ ختم کر دیا۔ سامعہ حجاب نے کہا کہ اگر میرا انجام بھی میری دوست ثناء یوسف کی طرح قتل پر ہوتا تو لوگ ہمدردی کرتے، مگر چونکہ میں زندہ ہوں اس لیے مجھ پر الزامات لگائے جا رہے ہیں۔

ان کا کہنا تھا کہ 17 جون سے ہمارے درمیان تنازعہ چل رہا تھا، لیکن میں نے معاملے کو زیادہ نہیں اچھالا۔ تاہم، جب وہ اور اس کے اہل خانہ آج میرے کردار پر باتیں کر رہے ہیں، تو اب میں بھی تمام چیٹ، ریکارڈنگز اور اسکرین شاٹس منظر عام پر لاؤں گی۔سامعہ حجاب نے مزید کہا کہ اگر کوئی عورت کسی کے نکاح میں بھی ہو، تب بھی اسے زبردستی، تشدد یا اغواء کا نشانہ بنانا جائز نہیں۔ میرا حسن زاہد سے رشتہ ختم ہو چکا ہے، مگر منگنی ٹوٹنے کے باوجود اس نے میرا فون چھینا، مجھے گھسیٹا، تشدد کیا اور اغواء کرنے کی کوشش بھی کی۔انہوں نے کہا کہ میں اس وقت شدید ذہنی دباؤ میں ہوں، اس لیے عوام سے اپیل کرتی ہوں کہ حقائق جانے بغیر کسی رائے کا اظہار نہ کریں۔