اسلام آ با د (نیوز ڈیسک)بالی ووڈ کے معروف اداکار گووندا کی اہلیہ سنیتا آہوجا نے 38 سالہ ازدواجی رشتہ ختم کرنے کے لیے عدالت سے رجوع کر لیا ہے۔ اس خبر کی تصدیق اداکار کے مینجر نے بھی کی ہے۔بھارتی میڈیا رپورٹس کے مطابق سنیتا آہوجا نے ہندو میرج ایکٹ 1955 کی مختلف دفعات کے تحت باندرہ فیملی کورٹ میں طلاق کی درخواست جمع کرائی ہے، جس میں انہوں نے گووندا پر غیر ازدواجی تعلقات، حق تلفی اور بے وفائی جیسے الزامات بھی عائد کیے ہیں۔

رپورٹ کے مطابق یہ مقدمہ دسمبر 2024 میں دائر کیا گیا تھا، اور عدالت نے اداکار کو 25 مئی کو طلب کیا تھا۔ سنیتا آہوجا وقتاً فوقتاً سماعتوں میں پیش ہوتی رہیں، تاہم گووندا بارہا نوٹس کے باوجود نہ تو عدالت میں پیش ہوئے اور نہ ہی مشاورت کے سیشنز میں شریک ہوئے۔اطلاعات کے مطابق عدالت نے رواں سال جون سے دونوں کے درمیان معاملات طے کرنے کی کوشش کی، لیکن گووندا کی عدم دلچسپی کے باعث پیش رفت نہ ہو سکی۔ حال ہی میں سنیتا آہوجا نے اپنے یوٹیوب چینل پر جذباتی انداز میں کہا کہ انہوں نے ہمیشہ ایک خوشحال ازدواجی زندگی کی دعا کی، مگر حالات کچھ اور رخ اختیار کر گئے، حالانکہ انہیں گووندا اور دو خوبصورت بچے ملے۔واضح رہے کہ فروری میں اس جوڑی کے درمیان اختلافات کی خبریں اس وقت مزید شدت اختیار کر گئیں جب سنیتا نے سوشل میڈیا پروفائل سے اپنے نام کے ساتھ جڑا ’آہوجا‘ ہٹا دیا، اور یہ بھی سامنے آیا کہ وہ اور گووندا کئی برسوں سے علیحدہ رہ رہے ہیں۔