اسلام آباد (نیوزڈیسک)بالی ووڈ کے لیجنڈ اداکار دھرمیندر کا شمار اُن فنکاروں میں ہوتا ہے جنہوں نے فلمی دنیا میں قدم کسی پس منظر کے بغیر رکھا اور اپنی محنت کے بل پر شہرت کی بلندیوں کو چھوا۔بھارتی میڈیا رپورٹس کے مطابق دھرمیندر نے 1960 میں فلم “دل بھی تیرا ہم بھی تیرے” سے فلمی کیریئر کا آغاز کیا۔ دلچسپ بات یہ ہے کہ اس فلم میں اپنے پہلے کردار کے عوض انہیں صرف 51 روپے معاوضے کے طور پر دیے گئے تھے۔ابتدائی دور میں مالی مشکلات نے دھرمیندر کو شدید متاثر کیا۔

وہ کئی مرتبہ اپنے قریبی دوستوں کے گھروں میں رہنے پر مجبور ہوئے کیونکہ ان کے پاس کرائے کا گھر لینے کے لیے بھی وسائل نہیں تھے۔تاہم وقت کے ساتھ ان کی محنت رنگ لائی اور وہ بالی ووڈ کے کامیاب ترین ستاروں میں شامل ہو گئے۔ آج ان کی مجموعی دولت کا تخمینہ 450 کروڑ بھارتی روپے کے قریب لگایا جاتا ہے۔ ان کی آمدن صرف فلموں تک محدود نہیں بلکہ وہ رئیل اسٹیٹ اور ہوٹلنگ کے شعبوں میں بھی سرمایہ کاری کر چکے ہیں۔دھرمیندر کا 100 ایکڑ پر پھیلا ہوا لوناوالا فارم ہاؤس ان کی مہنگی ترین جائیدادوں میں شمار ہوتا ہے، جہاں وہ اکثر وقت گزارتے ہیں۔ اس فارم ہاؤس میں ہر قسم کی آسائشیں مثلاً باغ، سوئمنگ پول اور جدید طرز کا جم موجود ہے۔حال ہی میں وہ فلم “راکی اور رانی کی پریم کہانی” میں نظر آئے اور اب وہ اپنی آئندہ فلم “اکیس” میں اداکار امیتابھ بچن کے نواسے اگستیہ نندا کے ساتھ اسکرین شیئر کرتے دکھائی دیں گے۔