اسلام آباد (نیوز ڈیسک)کراچی کے پوش علاقے ڈیفنس فیز 6 میں اتحاد کمرشل کے قریب واقع ایک فلیٹ سے اداکارہ حمیرا اصغر علی کی لاش ملی ہے جو مبینہ طور پر کئی روز پرانی ہے۔تفصیلات کے مطابق، پولیس عدالتی احکامات کی تعمیل میں سوموار کی سہ پہر تقریباً 3 بج کر 15 منٹ پر فلیٹ خالی کروانے پہنچی۔ جب دروازہ مسلسل دستک کے باوجود نہ کھولا گیا تو مجبوراً دروازہ توڑ کر اندر داخل ہونا پڑا، جہاں زمین پر ایک خاتون کی لاش موجود تھی۔

پولیس ذرائع کا کہنا ہے کہ اداکارہ گزشتہ سات برسوں سے اسی فلیٹ میں مقیم تھیں اور اکیلی زندگی گزار رہی تھیں۔ فلیٹ مالک کی جانب سے کرایہ نہ ملنے پر قانونی کارروائی کی گئی تھی اور اسی مقدمے کے سلسلے میں عدالتی بیلف کی آمد پر یہ افسوسناک واقعہ سامنے آیا۔ابتدائی تحقیقات کے مطابق، لاش 15 سے 20 دن پرانی محسوس ہوتی ہے، تاہم موت کی اصل وجہ جاننے کے لیے لاش کو پوسٹ مارٹم کے لیے اسپتال منتقل کر دیا گیا ہے۔پولیس سرجن ڈاکٹر سمیعہ کا کہنا ہے کہ خاتون کی لاش مکمل طور پر سڑ چکی ہے، اور جسم سے حاصل کردہ نمونوں کو فرانزک تجزیے کے لیے محفوظ کر لیا گیا ہے۔ حتمی معلومات پوسٹ مارٹم رپورٹ مکمل ہونے پر سامنے آئیں گی۔