اسلام آباد(نیوز ڈیسک)معروف اداکارہ اور ماڈل مہربانو نے حالیہ گفتگو میں شوبز انڈسٹری کے کچھ حساس اور نظر انداز پہلوؤں کو بے نقاب کیا ہے۔ انہوں نے اپنے تجربات کا ذکر ڈان نیوز کے پروگرام ہنسنا منع ہے، میں شرکت کے دوران کیا۔انٹرویو کے دوران مہربانو نے بتایا کہ وہ ٹی وی ڈراموں میں روایتی معصوم لڑکی کے کرداروں سے گریز کرتی ہیں۔ ان کے بقول، وہ ایسے مضبوط اور بااعتماد خواتین کے کرداروں کو ترجیح دیتی ہیں جو اپنی زندگی کے فیصلے خود کرتی ہیں، کیونکہ ایسے کردار ان کی حقیقی شخصیت سے ہم آہنگ ہوتے ہیں۔
اداکارہ نے گفتگو میں یہ حیران کن انکشاف بھی کیا کہ کئی معروف اداکاروں کی ذاتی صفائی کا معیار کمزور ہے۔ ایک موقع پر انہوں نے بتایا کہ وہ اداکار عفان وحید کے ساتھ ایک پروجیکٹ میں کام کر رہی تھیں جب انہیں ایک ساتھی اداکار سے شدید جسمانی بو محسوس ہوئی۔ انہوں نے تاہم پروفیشنل رویہ اپناتے ہوئے اس پر کوئی تبصرہ نہیں کیا۔مہربانو نے مزید بتایا کہ پاکستانی انٹرٹینمنٹ انڈسٹری میں مرد و خواتین دونوں کو ہراسانی جیسے مسائل کا سامنا رہتا ہے۔ انہوں نے اعتراف کیا کہ کام کے دوران کیمرے کے سامنے اور پردے کے پیچھے، کئی بار غیر اخلاقی پیشکشوں کا سامنا کرنا پڑتا ہے، جیسے کہ “اگر تم یہ کام کرو گے تو تمہیں پروجیکٹ دیا جائے گا۔”انہوں نے یہ بھی کہا کہ شوبز میں اکثر بااثر افراد نوجوان فنکاروں پر دباؤ ڈالتے ہیں، اور یہ تلخ حقیقت ہے کہ بظاہر چمکتی دمکتی دنیا کے پیچھے کئی سیاہ پہلو چھپے ہوتے ہیں۔
