اسلام آباد (نیوز یسک)مشہور مارننگ شو کی میزبان اور اداکارہ ندا یاسر نے حالیہ پروگرام کے دوران انکشاف کیا ہے کہ ان کے اعتماد کا ناجائز فائدہ اٹھاتے ہوئے ان کی غیر ملکی گھریلو ملازمہ نے قیمتی اشیاء چوری کر لیں۔ندا یاسر نے بتایا کہ ان کے بیٹے بالاج کی پیدائش کے بعد انہوں نے ایک فلپائنی خاتون کو بطور نگران ملازمت پر رکھا تھا۔ ان کے مطابق، چونکہ خاتون غیر ملکی تھی اور ان پر بھروسہ کیا جاتا تھا، اس لیے ان کی تلاشی کبھی نہیں لی جاتی تھی، جب کہ دیگر ملازمین کی نگرانی کی جاتی تھی۔اداکارہ کے مطابق، انہیں اس وقت شک ہوا جب ایک روز انہوں نے اپنا پرس اس ملازمہ کے حوالے کیا اور بعد میں اس میں موجود یوروز غائب پائے گئے۔

اس واقعے نے ندا کو چوکنا کر دیا اور جب ملازمہ نے چھٹی پر جانے کی اجازت مانگی تو انہوں نے خود اس کے ہمراہ جانے کا فیصلہ کیا۔ندا نے مزید بتایا کہ جب وہ ملازمہ کے گھر پہنچیں تو وہاں انہیں حیرت انگیز انکشاف ہوا۔ چوری شدہ اشیاء کے تین بڑے بیگ وہاں موجود تھے، جن میں ان کے قیمتی موبائل فونز، پولو برانڈ کی شرٹ اور گمشدہ 300 یوروز شامل تھے۔ ان اشیاء کو فلپائن منتقل کرنے کی تیاری کی جا رہی تھی۔میزبان نے بتایا کہ چونکہ ملازمہ کافی عرصہ ان کے گھر میں خدمات سرانجام دیتی رہی تھی اور تمام سامان واپس مل چکا تھا، اس لیے انہوں نے معاملہ پولیس کو رپورٹ نہیں کیا۔ ان کے مطابق، یہ واقعہ ان کے لیے ایک اہم سبق بن گیا کہ اندھا اعتماد کبھی کبھار نقصان دہ ثابت ہو سکتا ہے۔