اسلام آباد (نیوز ڈیسک)اسلام آباد میں معروف سوشل میڈیا شخصیت ثناء یوسف کے قتل میں ملوث گرفتار ملزم عمر حیات، جسے “کاکا” کے نام سے بھی جانا جاتا ہے، نے مجسٹریٹ کے سامنے مبینہ طور پر اپنے جرم کا اعتراف کر لیا ہے۔ذرائع کے مطابق ملزم نے دوران بیان بتایا کہ اس نے ثناء یوسف کو اس لیے قتل کیا کیونکہ وہ اس سے ملاقات سے انکار کرتی رہی تھی۔

عمر حیات کے مطابق وہ ثناء یوسف سے پہلی بار ملاقات کے لیے آیا تھا اور طویل انتظار کے بعد بھی اس سے ملاقات نہیں ہو سکی، بلکہ اسے واپس بھیج دیا گیا۔ملزم نے بتایا کہ وہ اس دن ثناء یوسف کی سالگرہ کا تحفہ بھی لایا تھا، جو اس نے قبول نہیں کیا۔ بعدازاں 2 جون کو ثناء یوسف نے دوبارہ ملاقات کے لیے بلایا، لیکن ایک بار پھر ملاقات نہیں ہوئی۔ عمر حیات کا کہنا ہے کہ وہ اس رویے پر شدید غصے میں تھا اور اسی غصے میں اس نے ثناء یوسف کے گھر جا کر اسے فائرنگ کرکے قتل کر دیا۔یاد رہے کہ 2 جون کو اسلام آباد میں ثناء یوسف کو ان کے گھر پر گولیاں مار کر قتل کیا گیا تھا۔ واردات کے بعد ملزم فرار ہو کر فیصل آباد چلا گیا تھا، جہاں پولیس نے اسے گرفتار کر لیا۔