اسلام آباد (نیوز ڈیسک ) معروف ٹک ٹاکر ثناء یوسف کے قتل کے دلخراش واقعے کے بعد نیشنل سائبر ایمرجنسی رسپانس ٹیم (سرٹ) نے سوشل میڈیا پر سرگرم وی لاگرز، انفلوئنسرز، بلاگرز اور دیگر ڈیجیٹل تخلیق کاروں کے لیے ایک اہم ایڈوائزری جاری کر دی ہے۔سماء ٹی وی کے مطابق، جاری کردہ ہدایات میں سوشل میڈیا صارفین کو اپنی سیکیورٹی یقینی بنانے کے لیے کئی اقدامات کی سفارش کی گئی ہے۔
ایڈوائزری میں زور دیا گیا ہے کہ وی لاگرز اور ٹک ٹاکرز لائیو اسٹریمنگ کے دوران اپنی موجودہ جگہ ظاہر کرنے سے گریز کریں، غیر معروف افراد کو سوشل میڈیا پر دوست نہ بنائیں اور مشتبہ ملاقاتوں یا دعوتوں سے بچیں۔ڈیجیٹل مواد تخلیق کرنے والوں کو ہدایت دی گئی ہے کہ وہ اپنی آن لائن سرگرمیوں کو ذمہ داری سے جاری رکھیں، اور ذاتی معلومات کی حفاظت کو اولین ترجیح دیں۔ نیشنل سرٹ نے خبردار کیا ہے کہ آپ کی شناخت یا نظریات کی بنیاد پر آپ کو آن لائن یا حقیقی دنیا میں خطرات لاحق ہو سکتے ہیں۔
ایڈوائزری میں یہ بھی کہا گیا ہے کہ اگر کسی بھی قسم کی جعلی ویڈیو یا آڈیو، ڈیپ فیک ٹیکنالوجی کے ذریعے آپ سے منسوب کی جائے تو فوراً اس کی تردید کریں اور متعلقہ پلیٹ فارمز کو اطلاع دیں۔سوشل میڈیا اکاؤنٹس کے لیے دوہری تصدیق (ملٹی فیکٹر آتھنٹیکیشن) اور مضبوط پاس ورڈز استعمال کرنے، رازداری کی سیٹنگز چیک کرنے، اور مشکوک لنکس کو نہ کھولنے کی بھی سختی سے تلقین کی گئی ہے۔نیشنل سائبر ایمرجنسی رسپانس ٹیم نے تخلیق کاروں کو مشورہ دیا ہے کہ وہ اپنے سوشل میڈیا پلیٹ فارمز پر تبصروں اور پیغامات کی باقاعدگی سے نگرانی کریں۔ اگر کوئی غیر اخلاقی، نازیبا یا دھمکی آمیز تبصرہ سامنے آئے تو فوراً اسے بلاک کریں اور سوشل میڈیا پلیٹ فارم کو رپورٹ کریں۔
