اسلام آباد (نیوز ڈیسک)اسلام آباد میں پیش آنے والے ٹک ٹاکر ثنا یوسف کے قتل کے واقعے میں پولیس نے بڑی پیش رفت کرتے ہوئے ملزم کو گرفتار کر لیا ہے۔ذرائع کے مطابق، پولیس نے سی سی ٹی وی فوٹیج اور جدید تکنیکی ذرائع کی مدد سے ملزم کی شناخت کی اور اسے رات گئے کارروائی کرتے ہوئے حراست میں لیا۔
حکام کا کہنا ہے کہ ملزم کا تعلق صوبہ پنجاب سے ہے اور اس کے قبضے سے قتل میں استعمال ہونے والا ہتھیار بھی برآمد کر لیا گیا ہے۔ابتدائی تفتیش کے دوران یہ بات سامنے آئی ہے کہ گرفتار شخص کا مقتولہ ثنا یوسف سے رابطہ تھا اور بظاہر قتل کی وجہ ذاتی رنجش بتائی جا رہی ہے۔ پولیس کا کہنا ہے کہ تفتیش کا دائرہ مزید وسیع کیا جا رہا ہے تاکہ واقعے کی مکمل حقیقت سامنے آ سکے۔یاد رہے کہ ثنا یوسف کو گزشتہ روز ان کے گھر میں فائرنگ کر کے قتل کر دیا گیا تھا۔
ایف آئی آر کے مطابق پیر کی شام تقریباً پانچ بجے ایک اجنبی شخص ان کے گھر میں داخل ہوا اور پستول سے دو گولیاں ثنا کے سینے پر ماریں، جس کے بعد وہ موقع سے فرار ہو گیا۔ شدید زخمی حالت میں ثنا کو فوری طور پر اسپتال منتقل کیا گیا، تاہم وہ زخموں کی تاب نہ لاتے ہوئے چل بسیں۔مقتولہ کی والدہ نے اپنے بیان میں کہا تھا کہ وہ قاتل کو سامنے آنے پر پہچان سکتی ہیں۔ اب جبکہ ملزم گرفتار ہو چکا ہے، پولیس کی مزید تفتیش جاری ہے۔مرحومہ ثنا یوسف کی میت کو ان کے آبائی علاقے اپر چترال روانہ کر دیا گیا ہے، جہاں ان کی تدفین کی جائے گی۔ ثنا سوشل میڈیا پر ایک متحرک اور معروف شخصیت کے طور پر جانی جاتی تھیں۔
