اسلام آباد (نیوز ڈیسک) وفاقی دارالحکومت میں قتل ہونے والی ٹک ٹاکر ثنا یوسف کے قتل سے متعلق اہم تفصیلات سامنے آ گئی ہیں۔ ابتدائی اطلاعات کے مطابق ثنا یوسف کو مبینہ طور پر ان کے کزن نے فائرنگ کر کے قتل کیا۔ واقعہ اُس وقت پیش آیا جب ان کے گھر مہمان موجود تھے، اور اسی دوران ملزم نے فائرنگ کر دی، جس کے نتیجے میں ثنا یوسف کو دو گولیاں لگیں اور وہ شدید زخمی ہو گئیں۔
تاہم بعد ازاں ثنا یوسف کی والدہ کی طرف سے درج کروائی گئی ایف آئی آر میں کہا گیا کہ ایک نامعلوم شخص گھر میں داخل ہوا جس نے ثنا کے اوپر سیدھی فائرنگ کی۔ثنا کو دو گولیاں لگیں جس کی وجہ سے وہ جاں بحق ہوگئی۔زخمی حالت میں پہلے انہیں کے آر ایل ہسپتال منتقل کیا گیا، تاہم حالت نازک ہونے کی وجہ سے بعد ازاں شفا انٹرنیشنل ہسپتال لے جایا گیا، جہاں وہ زخموں کی تاب نہ لاتے ہوئے دم توڑ گئیں۔
نجی ٹی وی کے مطابق ثنا یوسف میڈیکل کے پہلے سال کی طالبہ تھیں اور سوشل میڈیا پر کافی متحرک تھیں۔ واقعے کے بعد پولیس نے موقع پر پہنچ کر علاقے کو گھیرے میں لے لیا اور شواہد اکٹھے کر لیے۔ پوسٹ مارٹم پمز ہسپتال میں جاری ہے، جس کے مکمل ہونے کے بعد لاش ورثا کے حوالے کی جائے گی۔
واضح رہے کہ ابتدائی طور پر یہ اطلاعات آئی تھیں کہ ثنا یوسف کو ان کے کزن نے قتل کیا ہے لیکن ایف آئی آر کے متن سے حقیقت واضح ہوگئی ہے۔
