اسلام آباد (نیوز ڈیسک) پاکستانی سپر اسٹار فواد خان ایک طویل وقفے کے بعد ایک بار پھر بھارتی فلم انڈسٹری میں جلوہ گر ہونے کے لیے تیار ہیں۔ تقریباً نو برس بعد وہ بالی ووڈ اسکرین پر اپنی واپسی کر رہے ہیں۔
فواد خان کی نئی فلم کا نام ‘ابیر گلال’ ہے، جس میں ان کے مدمقابل اداکارہ وانی کپور مرکزی کردار نبھا رہی ہیں۔ حال ہی میں اس فلم کا پہلا رومانوی نغمہ ’عشق خدایا‘ ریلیز کیا گیا ہے، جسے مشہور گلوکار عریجیت سنگھ اور شلپا راؤ نے گایا ہے۔ یہ گیت ریلیز ہوتے ہی شائقین میں مقبول ہو گیا ہے۔
یاد رہے کہ فواد خان کو آخری مرتبہ 2016 کی فلم ’کپور اینڈ سنز‘ میں دیکھا گیا تھا۔ اب وہ ایک بار پھر بڑے پردے پر جلوہ دکھانے جا رہے ہیں، اور اس فلم کی وجہ سے دوبارہ سرخیوں میں آ گئے ہیں۔
ذرائع کا کہنا ہے کہ فواد خان کو اس بڑے بجٹ کی فلم کے لیے 5 سے 10 کروڑ روپے تک کا معقول معاوضہ دیا جا رہا ہے، جبکہ پاکستان میں وہ ہر ٹی وی ڈرامے کی قسط کے لیے تقریباً 15 سے 20 لاکھ روپے وصول کرتے ہیں۔
فلم کی ہیروئن وانی کپور کا معاوضہ بھی خبروں میں ہے، جسے تقریباً ڈیڑھ کروڑ روپے بتایا جا رہا ہے۔
‘ابیر گلال’ کی ہدایت کاری آرتی ایس بگڈی نے کی ہے اور فلم کی شوٹنگ لندن کے دلکش مقامات پر مکمل کی گئی ہے۔ فلم 9 مئی کو سینما گھروں میں ریلیز کی جائے گی، جس کا شائقین کو بے چینی سے انتظار ہے۔
