اسلام آباد (نیوز ڈیسک) بالی ووڈ کے ماضی کے دو بڑے نام، کشور کمار اور مدھو بالا کی نجی زندگی کے دردناک پہلو ایک بار پھر خبروں کی زینت بن گئے ہیں۔
مدھو بالا کی بہن مدھر بھوشن نے ایک حالیہ انٹرویو میں انکشاف کیا کہ ان کی بہن کو بیماری کے دنوں میں شوہر کشور کمار کی طرف سے مکمل تنہائی کا سامنا کرنا پڑا۔ ان کا کہنا تھا کہ کشور کمار نے مدھو بالا کا خیال رکھنے کے بجائے انہیں اکیلا چھوڑ دیا تھا۔
مدھو بالا، جنہیں فلمی دنیا میں ’ٹریجڈی کوئین‘ کے نام سے یاد کیا جاتا ہے، نے اداکار دلیپ کمار سے تعلق ختم ہونے کے بعد کشور کمار سے شادی کی۔ اس وقت مدھو بالا دل کی ایک پیچیدہ بیماری میں مبتلا ہو چکی تھیں اور ڈاکٹروں نے پیش گوئی کی تھی کہ ان کے پاس صرف دو سال کی زندگی باقی ہے۔
مدھر بھوشن کے مطابق، کشور کمار مدھو بالا کو علاج کے لیے لندن ضرور لے گئے، لیکن جب وہاں کے ڈاکٹروں نے امید چھوڑ دی تو وہ انہیں واپس لا کر اپنے میکے میں چھوڑ گئے۔ ان کا کہنا تھا کہ کشور نے یہ کہہ کر خود کو علیحدہ کر لیا کہ وہ اپنے کاموں میں مصروف ہیں اور دیکھ بھال کے لیے وقت نہیں نکال سکتے۔
بعد ازاں کشور کمار نے مدھو بالا کے لیے ممبئی کے کارٹر روڈ پر ایک فلیٹ کا بندوبست کیا، جہاں وہ تنہا زندگی گزارنے پر مجبور ہو گئیں۔ مدھر بھوشن کا کہنا تھا کہ کشور کمار مہینوں تک نہ آتے اور ان سے رابطہ بھی کم ہی رکھتے تھے، اکثر فون بھی بند ہوتا تھا۔
انہوں نے مزید بتایا کہ کشور کمار بہن کو تسلی دینے کے بجائے کہتے تھے، “اگر میں روز آؤں گا تو تم مجھے دیکھ کر روؤ گی، اور یہ تمہارے دل کے لیے نقصان دہ ہوگا۔”
مدھر بھوشن نے بتایا کہ اگرچہ ڈاکٹروں نے صرف دو سال کی زندگی کا کہا تھا، لیکن مدھو بالا کی مضبوط قوتِ ارادی نے انہیں مزید نو سال جینے کا حوصلہ دیا۔ افسوس کہ وہ 1969 میں صرف 36 سال کی عمر میں دنیا سے رخصت ہو گئیں۔
