اسلام آباد (شوبز ڈیسک)  معروف اداکار اور کامیڈین ایاز سموں نے ایک حالیہ انٹرویو میں اپنے فنی سفر اور ایک نجی ٹی وی شو میں جیتی گئی گاڑی کے حوالے سے پیش آنے والے دلچسپ مگر پریشان کن واقعات کا انکشاف کیا ہے۔

ایاز سموں نے گفتگو کے دوران بتایا کہ اُن کے کیریئر کی شروعات بھارت کے مقبول مزاحیہ شو دی گریٹ انڈین لافٹر چیلنج 2 سے ہوئی، جہاں وہ اسٹینڈ اپ کامیڈین کے طور پر نظر آئے۔ یہ پہلا موقع تھا جب کسی پاکستانی کامیڈین نے اس شو میں حصہ لیا تھا۔انہوں نے بتایا کہ اس شو میں وہ سب سے کم عمر پاکستانی شرکت کنندہ تھے، اور انہوں نے پاکستان کے کئی سینئر مزاحیہ فنکاروں کے ساتھ اسٹیج شیئر کیا۔ بعد ازاں، کامیڈی کا کنگ کون نامی بھارتی پروگرام میں انہیں پہلی پوزیشن حاصل ہوئی، جہاں انہیں 10 لاکھ روپے کا انعام بھی ملا، جبکہ اس پروگرام سے انہیں فی قسط کی بنیاد پر 18 لاکھ روپے کا مجموعی معاوضہ بھی حاصل ہوا۔اپنی کامیڈی کیرئیر کی بات کے بعد ایاز سموں نے ایک پاکستانی ٹی وی شو میں جیتی گئی کار کے حوالے سے بات کرتے ہوئے کہا کہ سال 2007 میں ایک پروگرام کے دوران انہوں نے قیمتی گاڑی جیتی جس کی اُس وقت کی قیمت 8 لاکھ 53 ہزار روپے تھی۔

تاہم، جیتنے کے بعد انہیں کہا گیا کہ پندرہ دن میں گاڑی فراہم کر دی جائے گی، مگر دو ماہ گزر جانے کے باوجود ایسا نہ ہو سکا۔ اس دوران انہیں آدھی رقم بطور کیش لینے کی تجویز دی گئی، جسے انہوں نے رد کر دیا۔ایاز کے مطابق، جب وہ اس فیصلے پر قائم رہے تو پروگرام کی انتظامیہ نے انہیں مطلع کیا کہ اگر وہ پیچھے نہ ہٹے تو گاڑی ضرور دی جائے گی۔ لیکن بعد میں انہیں کم قیمت کی گاڑی کی پیشکش کی گئی، جو انہوں نے پھر سے ٹھکرا دی۔ بالآخر، چینل کے اعلیٰ حکام اور مالک کی مداخلت کے بعد، انہیں اصل میں جیتی گئی گاڑی فراہم کر دی گئی۔