اسلام آباد (نیوز ڈیسک) بھارتی ٹی وی انڈسٹری کے مقبول ترین کرائم سیریز “سی آئی ڈی” کے معروف کردار اے سی پی پردھیومن کا شو سے اختتام ہو گیا ہے، جس کی باقاعدہ تصدیق سیریز کے پروڈیوسرز نے بھی کر دی ہے۔

تقریباً 27 سال تک ناظرین کی توجہ کا مرکز رہنے والا کردار “کچھ تو گڑبڑ ہے دیا” اور “دروازہ توڑو دیا” جیسے جملوں کی بدولت ہر عمر کے مداحوں میں مقبول رہا، مگر اب شائقین کو یہ دلکش مکالمے سننے کو نہیں ملیں گے۔

بھارتی میڈیا رپورٹس کے مطابق، “سی آئی ڈی” کے نئے ورژن کا پرومو نیٹ فلکس پر جاری کیا گیا ہے جس میں اے سی پی پردھیومن کی موت کا اشارہ دیا گیا ہے۔ پرومو میں دکھایا گیا ہے کہ ایک خون آلود ہاتھ زمین پر پڑا ہے، جس میں وہ مخصوص انگوٹھی نمایاں ہے جو اے سی پی پردھیومن کی پہچان تھی۔

اسی منظر میں انسپکٹر دیا کو روتے اور انسپکٹر ابھیجیت کو شدید صدمے میں دیکھا جا سکتا ہے۔ پرومو کے سامنے آتے ہی سوشل میڈیا صارفین کی جانب سے شدید ردعمل سامنے آیا، مداحوں نے کہا کہ اے سی پی پردھیومن، دیا اور ابھیجیت کی موجودگی کے بغیر سی آئی ڈی کا تصور ہی ممکن نہیں۔

اگرچہ ابتدائی طور پر کچھ ناظرین نے یہ قیاس کیا کہ شاید یہ منظر صرف پرومو کا حصہ ہو اور اصل کہانی مختلف ہو، لیکن چینل نے واضح کر دیا ہے کہ آنے والی اقساط میں اے سی پی پردھیومن کا کردار اب مزید شامل نہیں ہوگا۔ اس کے ساتھ ہی ایک یادگاری تصویر بھی جاری کی گئی ہے جس میں ان کے کردار کو خراج عقیدت پیش کیا گیا ہے۔

سی آئی ڈی کے اس عظیم کردار کا اختتام ناظرین کے لیے ایک جذباتی لمحہ بن گیا ہے، جس نے برسوں تک شائقین کو ٹی وی اسکرین سے جوڑے رکھا۔