کراچی (این این آئی)پاکستانی اداکارہ حرا مانی کو کرینہ کپور سے خود کا موازنہ کرنا مہنگا پڑ گیا۔ایک انٹرویو میں اداکارہ حرا مانی سے سوال کہ کیا وہ بالی ووڈ فلم جب وی میٹ میں گیت (کرینہ کپور کا کردار)ادا کر سکتی تھیں تو حرا مانی نے ناصرف اس سے اتفاق کیا بلکہ دعوی کیا یہ کردار میری حقیقی زندگی سے متاثر ہو کر لکھا گیا ہو گا۔

انہوں نے کہا کہ جب یہ فلم ریلیز ہوئی تو میری خالہ نے فورا مجھے کال کی اور کہا کہ یہ فلم تو تمہارے کردار پر بنی ہے، میں نے بھی جب فلم دیکھی تو محسوس کیا کہ اس کردار میں مجھ سے کافی مماثلت ہے، میرا خیال ہے کہ ہدایتکار امتیاز علی نے مجھ سے ملاقات کی ہو گی تبھی انہوں نے گیت کا کردار ایسا لکھا۔حرا مانی کے اس بیان کے بعد سوشل میڈیا پر صارفین کی جانب سے سخت ردِعمل سامنے آیا۔ کئی لوگوں نے ان پر خودپرستی کا الزام لگایا جبکہ کچھ نے مذاقا کہا کہ وہ کرینہ کپور بننے کی کوشش کر رہی ہیں لیکن اصل ہمیشہ اصل ہی رہتا ہے۔بعض نے کہا کہ یہ پاکستان کی اروشی روٹیلا ہیں، بس خود کی تعریفیں کرتی رہتی ہیں۔حرا مانی کی جانب سے اس تنقید کا کوئی جواب سامنے نہیں آیا ہے۔