اسلام آباد (نیوز ڈیسک)معروف ڈرامہ نگار خلیل الرحمان قمر نے حالیہ دنوں میں ایک پوڈکاسٹ کے دوران ایسا انکشاف کیا ہے جس نے شوبز انڈسٹری میں ہلچل مچادی ہے۔ پہلی بار انہوں نے اداکار فیصل قریشی کی سابقہ اہلیہ سے اپنی شادی کا کھل کر ذکر کیا ہے۔یہ انکشاف اس وقت سامنے آیا جب خلیل الرحمان قمر نے معروف صحافی ارشاد بھٹی کے پوڈکاسٹ میں شرکت کی۔پوڈکاسٹ کے دوران ارشاد بھٹی نے ان سے ڈرامہ ’’میرے پاس تم ہو‘‘ کے بارے میں ایک دلچسپ سوال کیا۔
انہوں نے پوچھا کہ اس ڈرامے میں ایک خاتون اپنے شوہر کو چھوڑ کر دوسرے مرد کے پاس جاتی ہے، اور اسی طرح فیصل قریشی کی اہلیہ نے بھی انہیں چھوڑ کر آپ سے شادی کی۔ کیا یہ ڈرامہ آپ کی ذاتی زندگی سے متاثر تھا؟اس سوال کے جواب میں خلیل الرحمان قمر نے واضح کیا کہ ’’میرے پاس تم ہو‘‘ ان کی ذاتی زندگی سے متاثر نہیں تھا، لیکن جب یہ ڈرامہ نشر ہو رہا تھا تو لوگوں نے ایسی قیاس آرائیاں ضرور کیں۔انہوں نے مزید کہا کہ فیصل قریشی ان کے قریبی دوست ہیں اور انہوں نے ہی انہیں شوبز میں متعارف کرایا تھا۔ خلیل نے فیصل کی اداکاری کی تعریف کرتے ہوئے کہا کہ وہ ایک بہترین اداکار ہیں اور ان کا آڈیشن دیکھ کر وہ حیران رہ گئے تھے۔تاہم، بعد میں خلیل الرحمان قمر نے وہ بات کہی جس کا سب کو انتظار تھا۔
انہوں نے تسلیم کیا کہ انہوں نے فیصل قریشی کی سابقہ اہلیہ سے شادی کی ہے، لیکن اس بات پر زور دیا کہ فیصل کی طلاق کی وجہ وہ نہیں تھے۔خلیل کا کہنا تھا کہ فیصل قریشی اور ان کی اہلیہ کے درمیان علیحدگی پہلے سے طے شدہ تھی، اور انہوں نے اس معاملے پر دونوں کو سمجھانے کی کوشش بھی کی تھی۔ ان کا مزید کہنا تھا کہ اس وقت ان کی فیصل کی سابقہ اہلیہ سے صرف دو بار ملاقات ہوئی تھی اور وہ انہیں بیٹا کہہ کر مخاطب کرتی تھیں۔ شادی کی وجہ کے حوالے سے انہوں نے کہا کہ اس بارے میں وہ ابھی تفصیلات نہیں بتا سکتے لیکن جلد ہی کھل کر بات کریں گے۔خلیل الرحمان قمر کے اس بیان نے سوشل میڈیا پر نئی بحث چھیڑ دی ہے، اور لوگ اس کہانی کے مزید پہلو جاننے کے لیے بے صبری کا مظاہرہ کر رہے ہیں۔
