ممبئی (این این آئی)مصنفہ بننے کے بعد اداکارہ کرینہ کپور خان نے اب پروڈکشن کی دنیا میں بھی قدم رکھ دیا۔ میڈیا رپورٹس کے مطابق وہ فلم ساز ہنسل مہتا کے نئے پروجیکٹ میں ایکتا کپور خان کے ساتھ مل کر فلم پروڈیوس کریں گی۔بتایا گیا ہے کہ اسی پروجیکٹ میں کرینہ کپور خان اداکاری کرتی دکھائی دیں گی۔ اس حوالے سے ٹریڈ اینالسٹ ترن آدرش نے ایک پوسٹ میں کرینہ کپور کے فلم پروڈیوس کرنے سے آگاہ کیا تھا۔اسی دوران انھوں نے یہ بھی بتایا تھا کہ ہنسل مہتا کی یہ نئی فلم حقیقی واقعات سے متاثر ہوکر بنائی جارہی ہے جبکہ اس کی عکس بندی برطانیہ میں ہوگی۔ خیال رہے کہ ایک روز قبل کرینہ کپور نے کرن جوہر کے ساتھ انسٹاگرام پر اپنی کتاب کی رونمائی کے لیے ایک براہِ راست سیشن کیا تھا۔اس دوران انھوں نے اپنی نجی زندگی سے متعلق کچھ تفصیلات شیئر کیں تاہم فلم کی پروڈکشن سے متعلق کچھ نہیں بتایا تھا۔