اسلام آباد (این این آئی)پاکستان تحریک انصاف کے رہنما اور وفاقی وزیر سائنس و ٹیکنالوجی فواد چوہدری نے کہا ہے کہ اْنہوں نے معروف اداکارہ مہوش حیات کو تمغہ امتیاز دینے کیلئے اْن کا نام تجویز کیا تھا۔ایک انٹرویو میں فواد چوہدری نے انکشاف کیا کہ اْنہوں نے مہوش حیات کا نام تمغہ امتیاز کے لیے تجویز کیا تھا۔

پروگرام کے میزبان نے فواد چوہدری سے سوال کیا کہ آپ کس طرح کی موسیقی سے لطف اندوز ہوتے ہیں اور آپ کو کون سی اداکارہ پسند ہے؟ فواد چوہدری نے کہا کہ وہ استاد نصرت فتح علی خان کی موسیقی سے لطف انداز ہوتے ہیں۔فواد چوہدری نے کہا کہ اْن کو صوفی کلام اور قوالی بہت پسند ہے۔وفاقی وزیر سائنس و ٹیکنالوجی فواد چوہدری نے کہا کہ اْن کی پسندیدہ اداکارہ مہوش حیات ہیں۔اْنہوں نے کہا کہ میں مہوش حیات سے پہلے کبھی نہیں ملا تھا تاہم جب تمغہ امتیاز کے لیے بہترین اداکارہ کا نام تجویز کرنے کی بات آئی تھی تو میں نے ان کا نام تمغہ امتیاز کیلئے تجویز کیا تھا جس کی وجہ ان کا فلموں میں اداکاری اور کام دیگر دوسری اداکاروں سے بہت اچھا ہونا ہے۔اْنہوں نے کہا کہ پاکستان میں ایک بڑی عجیب بات ہے کہ ایوارڈز کے لیے لوگ اتنی سفارشیں کرواتے ہیں جس کی کوئی حد نہیں۔وفاقی وزیر سے سوال کیا گیاکہ کیا مہوش حیات کا نام تمغہ امتیاز کے لیے تجویز کرنے کیلئے آپ سے سفارش کروائی گئی تھی؟میزبان کے اِس سوال کے جواب میں فواد چوہدری نے کہا کہ نہیں میں ایوارڈز کو بہت سنجیدگی سے لیتا ہوں اور میں نے کہا تھا کہ ایوارڈ صرف اْن کو ہی ملنا چاہیے جو اپنے شعبوں کے ٹاپرز ہیں۔

موضوعات:فواد چوہدری