نوشہرو فیروز(این این آئی)سندھ میں ڈکیتی لوٹ مار کی وارداتیں بڑھتی جا رہی ہیں سنگدل ڈاکوئوں نے نوشہروفیروز میں میت لے جانے والی ایمبولینس کو بھی لوٹ لیا۔تفصیلات کے مطابق اندرون سندھ میں ڈکیتی اور لوٹ مار کی وارداتیں بڑھتی جا رہی ہیں اور لوگ اتنے غیر محفوظ ہوگئے ہیں کہ میت اور ایمبولینس بھی ڈاکوئوں کی دسترس سے محفوظ نہیں رہے ہیں۔

نوشہرو فیروز میں ڈاکوئوں نے سنگ دلی کی انتہا کرتے ہوئے میت لے جانے والی ایمبولینس کو بھی نہ بخشا اور اس کو لوٹ لیا۔نوشہرو فیروز سے ایک ٹیچر کی والدہ کی میت ایمبولینس میں اس کے آبائی گائوں لے جائی جا رہی تھی کہ تھانہ درس کی حدود میں ڈاکوئوں نے ایمبولینس کو روکا اور اس میں سوار میت کے غمزدہ لواحقین سے 50 ہزار روپے، موبائل فون اور زیورات چھین لیے۔متاثرہ افراد نے ڈکیتی کے خلاف مورو نیو جتوئی لنک روڈ پر احتجاج بھی کیا۔