اسلام آباد (نیوز ڈیسک) نیشنل ڈیٹا بیس اینڈ رجسٹریشن اتھارٹی (نادرا) نے شہریوں کے شناختی ریکارڈ کے تحفظ کو بہتر بنانے کے لیے آنکھوں کی پتلیوں کے اسکین کی سہولت مفت فراہم کر رکھی ہے، جس سے بچوں کا بائیومیٹرک ریکارڈ بھی محفوظ بنایا جا سکتا ہے۔
نادرا کے مطابق والدین تین سال یا اس سے زیادہ عمر کے بچوں کو اپنے قریبی رجسٹریشن سینٹر لے جا کر آنکھوں کا اسکین کروا سکتے ہیں۔ یہ سہولت ان بچوں کے لیے بھی دستیاب ہے جن کا ب فارم یا جووینائل کارڈ پہلے ہی جاری ہو چکا ہے۔
اتھارٹی کا کہنا ہے کہ آنکھوں کے اسکین کو شناختی ریکارڈ کا حصہ بنانے کا مقصد شہریوں کی شناخت کو مزید محفوظ بنانا اور ذاتی معلومات کے غلط استعمال کی روک تھام میں مدد فراہم کرنا ہے۔
نادرا میں بچوں کی عمر کے مطابق ب فارم اور جووینائل کارڈ کے اجرا کے لیے تصویر سمیت ضروری بائیومیٹرک معلومات درج کی جاتی ہیں۔ مقررہ طریقہ کار کے تحت تین سے 10 سال کی عمر کے بچوں کی تصویر اور آنکھوں کا اسکین لیا جاتا ہے، جبکہ 10 سے 18 سال تک کے بچوں کی شناختی دستاویزات کے لیے تصویر، انگلیوں کے نشانات اور آنکھوں کا اسکین ریکارڈ کیا جاتا ہے۔
