اسلام آباد (نیوز ڈیسک) پنجاب کے شہری اب ڈرائیونگ لائسنس کی موجودہ صورتحال جاننے کے لیے متعلقہ دفاتر کے بار بار چکر لگانے کے بجائے گھر بیٹھے آن لائن معلومات حاصل کرسکتے ہیں۔ حکومت پنجاب کے ڈرائیونگ لائسنس انفارمیشن مینجمنٹ سسٹم (DLIMS) پر یہ سہولت دستیاب ہے،

جس کے ذریعے قومی شناختی کارڈ نمبر درج کرکے لائسنس کی پیش رفت معلوم کی جاسکتی ہے۔آن لائن ٹریکنگ کی اس سہولت سے شہری یہ جان سکتے ہیں کہ ان کا ڈرائیونگ لائسنس کس مرحلے میں ہے اور اس کی پرنٹنگ یا ترسیل کے حوالے سے کیا صورتحال ہے۔ اس طریقہ کار سے وقت کی بچت کے ساتھ غیر ضروری دفتری چکروں سے بھی بچا جاسکتا ہے۔لائسنس کا اسٹیٹس معلوم کرنے کے لیے شہریوں کو انٹرنیٹ براؤزر میں DLIMS Tracking تلاش کرکے پنجاب کے سرکاری ٹریکنگ پورٹل پر جانا ہوگا۔ وہاں متعلقہ خانے میں اپنا 13 ہندسوں پر مشتمل قومی شناختی کارڈ نمبر بغیر ڈیش کے درج کرنا ہوگا۔اس کے بعد اسکرین پر ظاہر ہونے والے سیکیورٹی کوڈ (CAPTCHA) کو درست طریقے سے درج کرکے ’Track License‘ کے بٹن پر کلک کریں۔ مطلوبہ معلومات جمع ہونے کے بعد لائسنس کی تازہ صورتحال اسکرین پر سامنے آجائے گی۔

اگر ٹریکنگ سسٹم پر ’Your regular license is in printing queue‘ کا پیغام دکھائی دے تو اس کا مطلب ہے کہ لائسنس ابھی پرنٹنگ کے انتظار میں ہے اور اس کی چھپائی کا عمل مکمل نہیں ہوا۔لائسنس کی پرنٹنگ مکمل ہونے کے بعد اسے ترسیل کے لیے روانہ کیا جاتا ہے۔ اس مرحلے پر سسٹم میں پاکستان پوسٹ کا ٹریکنگ نمبر بھی فراہم کیا جاسکتا ہے، جسے استعمال کرتے ہوئے شہری پاکستان پوسٹ کی ویب سائٹ پر اپنے لائسنس کی ترسیل اور متوقع ڈیلیوری سے متعلق معلومات حاصل کرسکتے ہیں۔حکومت پنجاب کی جانب سے فراہم کردہ یہ آن لائن سہولت ڈرائیونگ لائسنس کے منتظر شہریوں کے لیے آسانی پیدا کرتی ہے، کیونکہ اب انہیں لائسنس کی پیش رفت جاننے کے لیے ذاتی طور پر دفاتر جانے کی ضرورت نہیں رہتی۔