کراچی (این این آئی) پیٹرولیم مصنوعات کی قیمتوں میں اضافے کے خلاف پی ٹی آئی کے ارکان سندھ اسمبلی نے انوکھا احتجاج کرتے ہوئے گدھا گاڑی پر سندھ اسمبلی پہنچ کر احتجاج ریکارڈ کرایا۔

پی ٹی آئی ارکان نے کہا کہ عوام پیٹرولیم مصنوعات کی قیمتوں میں اضافے اور مہنگائی کے بوجھ تلے دبے ہوئے ہیں جبکہ حکمرانوں کے شاہانہ اخراجات جاری ہیں۔ارکان نے کہا کہ اگر عوام سے کفایت شعاری کا مطالبہ کیا جارہا ہے تو اس کا آغاز وزیراعظم، وزرا اور حکمران خاندان کے اخراجات سے ہونا چاہیے۔ انہوں نے کہاکہ عوام پر بوجھ ڈال کر کفایت شعاری نہیں چل سکتی۔پی ٹی آئی ارکان نے حکمرانوں کے اخراجات پر بھی سوالات اٹھاتے ہوئے کہا کہ مریم نواز کے لیے مبینہ طور پر 11 ارب روپے کے طیارے کے استعمال کا حساب لیا جائے۔واضح رہے کہ پیٹرول کی قیمت 390 روپے 79 پیسے فی لیٹر جبکہ ڈیزل کی قیمت 424 روپے 92 پیسے فی لیٹر مقرر کی گئی ہے۔