اسلام آباد (نیوز ڈیسک) پاکستان میں مقبول ترین گاڑیوں میں شمار کی جانے والی سوزوکی آلٹو، جو اپنی کم قیمت، ایندھن کی بچت اور جدید ڈیزائن کی وجہ سے مشہور ہے، اب آسان اقساط پر دستیاب ہے۔ سوزوکی آلٹو کو جدید ایروڈینامک ڈیزائن کے ساتھ پیش کیا گیا ہے، جس کے بڑے سائز کے ہیڈ لیمپس، خوبصورت دروازے اور منفرد بیک ڈیزائن اسے مزید دلکش بناتے ہیں۔
اس کے کشادہ کیبن، جدید MP5 ٹچ اسکرین اور مختلف اسٹوریج آپشنز سفر کو مزید آرام دہ بناتے ہیں۔یہ کار حفاظتی خصوصیات کے لحاظ سے بھی ایک بہترین انتخاب ہے، جس میں سیٹ بیلٹس، ABS بریکس اور ایئربیگز شامل کیے گئے ہیں تاکہ ڈرائیونگ کے دوران زیادہ تحفظ فراہم کیا جا سکے۔ آلٹو میں 660cc کا آر-سیریز تھری سلینڈر پیٹرول انجن نصب ہے، جو شاندار کارکردگی کا مظاہرہ کرتا ہے۔پاکستان میں یہ گاڑی چار مختلف ویریئنٹس میں دستیاب ہے، جن میں VX، VXR، VXR-AGS اور VXL-AGS شامل ہیں۔ فروری 2025 کے لیے ان ماڈلز کی قیمتوں کا اعلان کر دیا گیا ہے، جس کے مطابق آلٹو VX کی قیمت 23 لاکھ 31 ہزار روپے، VXR کی قیمت 27 لاکھ 7 ہزار روپے، VXR-AGS کی قیمت 28 لاکھ 94 ہزار روپے اور VXL-AGS کی قیمت 30 لاکھ 45 ہزار روپے مقرر کی گئی ہے۔
معروف نجی بینک یو بی ایل نے صارفین کی سہولت کے لیے ایک فنانسنگ اسکیم متعارف کروائی ہے، جس کے تحت گاڑی کو پانچ سالہ اقساط میں خریدا جا سکتا ہے۔ مختلف ماڈلز کے لیے ڈاؤن پیمنٹ 6 لاکھ 99 ہزار روپے سے 9 لاکھ 13 ہزار روپے کے درمیان رکھی گئی ہے، جبکہ ماہانہ قسط 38 ہزار 809 روپے سے 50 ہزار 697 روپے تک ہوگی۔یہ اسکیم ان صارفین کے لیے ایک بہترین موقع ہے جو سوزوکی آلٹو خریدنے کے خواہشمند ہیں لیکن یکمشت ادائیگی کے بجائے آسان ماہانہ اقساط کو ترجیح دیتے ہیں۔ اس فنانسنگ پلان کے ذریعے کم بجٹ میں بھی ایک معیاری اور جدید گاڑی خریدنا ممکن ہو گیا ہے۔
