اسلام آباد (این این آئی)وزارت اقتصادی امور اور ایشیائی ترقیاتی بینک کے درمیان پاور ڈسٹری بیوشن پراجیکٹ کے لئے 200 ملین ڈالر کے قرض معاہدے پر دستخط ہوگئے۔ معاہدے پر دستخط کی تقریب وزارت اقتصادی امور میں منعقد ہوئی۔ وفاقی وزیر اقتصادی امور احد چیمہ کی منظوری کے بعد سیکرٹری ڈاکٹر کاظم نیاز نے وزارت اقتصادی امور کی جانب سے معاہدے پر دستخط کئے۔ جبکہ ایشیائی ترقیاتی بینک کی جانب سے ڈپٹی کنٹری ڈائریکٹر اسد علیم نے دستخط کئے۔ یہ منصوبہ ابتدائی طور پر بجلی کی تین تقسیم کار کمپنیوں: لاہور الیکٹرک سپلائی کمپنی (لیسکو)، ملتان الیکٹرک پاور کمپنی (میپکو) اور سکھر الیکٹرک پاور کمپنی (سیپکو) کو جدید میٹرنگ انفراسٹرکچر، ڈیٹا مینجمنٹ سسٹم، اور اثاثہ جات کی کارکردگی کے انتظام کے نظام کو بہتر بنانے میں کارگر ثابت ہوگا۔

اس موقع پر سیکرٹری اقتصادی امور نے پاور سیکٹرمیں مسلسل معاونت فراہم کرنے پر اے ڈی بی کے کرادر کو سراہتے ہوئے کہا کہ بینک ہمارا ایک قابل اعتماد ترقیاتی شراکت دار ہے۔ سیکرٹری نے کہا کہ اس منصوبے کو بجلی کی تقسیم کے نظام کو اپ گریڈ کرنے اور جدید بنانے کے لیے ڈیزائن کیا گیا تھا جس میں تقسیم کے دوران توانائی کے خاطر خواہ نقصانات کو کم کرنے پر توجہ دی گئی تھی۔ ڈاکٹر کاظم نیاز نے تمام متعلقہ اداروں خصوصی طور پر بجلی کی تقسیم کا کمپنیوں سے اصرار کیا کہ قرض کی رقم کا بروقت اور موثر استعمال کیا جائے۔ ڈپٹی کنٹری ڈائریکٹر ایشیائی ترقیاتی بینک اسد علیم نے اس پراجیکٹ کے لیے حکومت پاکستان کی فعال کرادر اور تعاون پر شکریہ ادا کیا۔ انہوں نے یقین دلایا کہ اے ڈی بی وزارت اقتصادی امور اور دیگر اسٹیک ہولڈرز کے ساتھ مل کر کام کرتا رہے گا تاکہ اس کی حمایت کو پاکستان کی ترقی کی ترجیحات سے ہم آہنگ کیا جا سکے۔