اسلام آباد (این این آئی)ایف بی آر نے کہا ہے کہ انکم ٹیکس گوشوارے جمع کروانے کی تاریخ میں مزید توسیع نہیں کی جائیگی، نان فائلرز کیخلاف کارروائیاں یکم نومبر کے بعد سے شروع ہوں گی۔چیئرمین فیڈرل بورڈ آف ریونیو راشد لنگڑیال نے کہا ہے کہ کہ وزیراعظم شہباز شریف نے سخت ہدایت کی ہے کہ ٹیکس چور کو نہیں چھوڑنا ہے۔

انہوں نے بتایا کہ انکم ٹیکس گوشوارے جمع کروانے والوں کی تعداد دگنی سے بڑھ کر 40لاکھ ہوگئی، پچھلے سال 14 لاکھ افراد نے ٹیکس گوشوارے جمع کروائے تھے۔انہوں نے بتایا کہ یکم جولائی سے 8اکتوبر 2024 کے دورانیے میں 9لاکھ 42ہزار نئے ٹیکس فائلر ملے۔ایف بی آر حکام کے مطابق 8اکتوبر تک 40لاکھ 78ہزار سے زائد افراد نے انکم ٹیکس گوشوارے جمع کروا دیے ہیں۔حکام کے گزشتہ برس اسی دورانیے میں 20لاکھ 67ہزار گوشوارے جمع ہوئے تھے جبکہ اس بار جلدی فائلنگ کرنے والوں کی تعداد میں 20لاکھ 11ہزار کا اضافہ ہوا ہے۔

ایف بی آر حکام کے مطابق رواں مالی سال گوشواروں کے ساتھ 106ارب سے زائد کا ٹیکس جمع ہوگیا ہے، مالی سال 2023 میں 63 لاکھ 54 ہزار گوشوارے جمع ہوئے تھے۔حکام کے مطابق یکم جولائی سے 8 اکتوبر تک 9 لاکھ 42 ہزار نئے فائلرز نے رجسٹریشن کرائی، گزشتہ سال کے اسی عرصے میں تقریبا 4 لاکھ نئے فائلر رجسٹر ہوئے تھے۔ایف بی آر کے مطابق انکم ٹیکس گوشوارے جمع کروانے کی تاریخ میں مزید توسیع نہیں کی جائیگی، نان فائلرز کیخلاف کارروائیاں یکم نومبر کے بعد سے شروع ہوں گی۔