اسلام آباد (این این آئی)پاکستان اور ایشیائی ترقیاتی بینک نے پبلک پر ائیوٹ پارٹنرشپ کے تحت بنیادی ڈھانچہ اور خدمات کے شعبہ میں پائیدار سرمایہ کاری کے حوالہ سے 250 ملین ڈالر قرضہ پروگرام پر دستخط کردئیے۔
اس حوالہ سے دستخطی تقریب جمعہ کویہاں وزارت اقتصادی امور میں ہوئی۔ وزارت کے سیکرٹری ڈاکٹر کاظم نیاز اور پاکستان میں ایشیائی ترقیاتی پر وگرام کے کنٹری ڈائریکٹر ینگ یی نے معاہدے پر دستخط کئے۔ ترجمان وزارت اقتصادی امور نے بتایا کہ پر وگرام کا بنیادی مقصد گورننس فریم ورک کو مضبوط کرنا اور وفاقی حکومت کی سطح پر پبلک پر ائیویٹ پارٹنرشپ کے لیے ماحول کو فعال بنانا ہے، پر وگرام کے تحت عوامی سرمایہ کاری کے انتظام و انصرام اور عوامی مالیات کے لیے پالیسی، قانونی اور ادارہ جاتی فریم ورک کو مضبوط بنایاجائیگا جبکہ قومی اور شعبہ جاتی بنیادی ڈھانچہ کی منصوبہ بندی پبلک پر ائیویٹ پارٹنرشپ منصوبوں کی تیاری میں بھی مددحاصل کی جائیگی۔
اس موقع گفتگوکرتے ہوئے سیکرٹری وزارت اقتصادی امور ڈاکٹر کاظم نیاز نے کہا کہ 2022 کے سیلاب کے بعد پاکستان کی اہم ترقیاتی ضروریات اور بحالی کی کوششوں میں ایشیائی ترقیاتی بینک نے کلیدی کرداراداکیاہے جس کیلئے پاکستان بینک کا شکر گزار ہے ۔انہوں نے کہا کہ ایشیائی ترقیاتی بینک کی جانب سے فراہم کردہ معاونت حکومت کے اصلاحاتی ایجنڈے، ادائیگیوں کے توازن اور ملک کے معاشی استحکام میں بھی اہم کردار ادا کر رہی ہے ۔انہوں نے کہا کہ نئے پر وگرام سے ترقیاتی عمل میں نجی شعبہ کی زیادہ شمولیت کے وزیراعظم کے وژن کو عملی جامہ پہنانے میں مدد ملے گی ۔ایشیائی ترقیاتی بینک کے کنٹری ڈائریکٹر نے پاکستان میں سٹریٹجک اور مالی طور پر سستی پی پی پیز کو فروغ دینے کے لیے سازگار ماحول کی اہمیت پر زور دیا۔
