اسلام آباد (این این آئی)وفاقی تحقیقاتی ادارے ایف آئی اے کے اینٹی کرپشن سرکل نے نارتھ ناظم آباد میں کارروائی کرتے ہوئے اوپن مارکیٹ سے 15 روپے کم ریٹ پر امریکی ڈالر فروخت کرنے والے بین الصوبائی گروہ کو گرفتار کر لیا۔ ملزمان کے قبضے سے پانچ ہزار ڈالر برآمد ہوئے ہیں۔ ایڈیشنل ڈائریکٹر ایف آئی اے اینٹی کرپشن سرکل جاوید بلوچ کے مطابق خفیہ اطلاع پر کارروائی میں فائیو اسٹار چورنگی سے امریکی ڈالر کی غیرقانونی خرید و فرخت میں ملوث دو ملزمان چوہدری نذیر اور سید وسیم احمد کو گرفتار کرلیا گیا۔
جاوید بلوچ کے مطابق مرکزی ملزم چوہدری اختر حسین آرائیں کا تعلق پنجاب کے ضلع راجن پور سے ہے۔ ملزمان اسٹیٹ بینک آف پاکستان (ایس بی پی)کی منظوری کے بغیر غیر ملکی کرنسی کی خرید و فرخت میں ملوث تھے۔حکام کے مطابق ملزمان اوپن مارکیٹ سے 15-10 روپے کم نرخ میں امریکی ڈالر فروخت کر رہے تھے۔ ملزمان کے قبضے سے 5 ہزار امریکی ڈالر برآمد ہوئے ہیں۔حکام نے بتایا کہ ملزمان نے اب تک ایک لاکھ امریکی ڈالر سے زائد کرنسی غیرقانونی طریقے سے فروخت کرنے کا انکشاف کیا ہے۔
ڈائریکٹر ایف آئی اے ضعیم اقبال شیخ کی ہدایت پر مرکزی ملزم اور گروہ کے دوسرے کارندوں کی گرفتاری کے لیے چھاپہ مار ٹیمیں تشکیل دے دی گئی ہیں۔ملزمان کے خلاف ایف آئی اے اینٹی کرپشن سرکل کراچی میں FER ACT کی دفعہ 4/23 کے تحت مقدمہ نمبر 33/2023 درج کرلیا گیا ہے۔
