کراچی(این این آئی)ستمبر سے ہونے والے حکومتی کریک ڈائون کے بعد ایف آئی اے نے اب تک 900 ملین ڈالر اسٹیٹ بینک میں جمع کروا دیئے۔تفصیلات کے مطابق ڈالر اسمگلنگ کے خلاف حکومتی اقدامات کے مثبت نتائج سامنے آرہے ہیں، ایپکس کمیٹی اجلاس میں اسمگلرز،ذخیرہ اندوزوں کیخلاف ایکشن کا حکم جاری کیا اور 6 ستمبر سے ڈالر اسمگلنگ اور ذخیرہ اندوزوں کے خلاف مشترکہ ایکشن کا آغاز کیا۔مشترکہ ایکشن میں ملک سے بیشمار اسمگلرز کی گرفتاری اور ڈالرز کی برآمدگی عمل میں لائی گئی ، ذرائع نے بتایا کہ ڈالر ملکی تاریخ کی بلند ترین سطح پرپہنچ چکا تھا حکومتی کاوشوں سے 335سے 280 پر آچکا ہے اور اگست کے اعدادوشمار کے مطابق قومی ذخائر 7.6 بلین تک گر چکے تھے۔

ستمبر سے ہونے والے ایکشن کے بعد ایف آئی اے نے نو سو ملین ڈالراسٹیٹ بینک میں جمع کروائے اور ایکشن کے تیسرے روز ہی پاکستانی روپے کی قدرسات فیصد بڑھ گئی۔رپورٹ کے مطابق ستمبر 2023 کو ایک ہی دن میں پاکستانی روپے کی قدر میں گیارہ روپے کا اضافہ دیکھنے میں آیا۔ایک ماہ میں ڈالرکی قدرمیں سترہ فیصد کمی ہوئی جبکہ فرنٹیئرپوسٹ نے لکھا کہ یورو کی قیمت تین سو تیس روپے سے کم ہو کر دوسوچھیانوے روپے، برطانوی پانڈ تین سو پچاسی روپے سے کم ہو کر تین سو پینتالیس روپے، درہم تراسی روپے سے چہتر روپے اور سعودی ریال اکیاسی روپے سے پچھتر روپے کا ہوگیا۔