لاہور( این این آئی)لاہور الیکٹرک سپلائی کمپنی کے چیف ایگزیکٹو انجینئر شاہد حیدر کی زیر نگرانی لیسکو ریجن میں بجلی چوروں کے خلاف آپریشن بھر پور طریقے سے جاری ہیں اورگیارویں روز کے آپریشن کے دوران تمام سرکل میں 755 کنکشنز بجلی چوری میں ملوث پائے گئے۔ترجمان کے مطابق504 بجلی چوروں کے خلاف ایف آئی آرز کی درخواستیں متعلقہ تھانوں میں دائر کر دی گئی ہیں جن میں سے222ایف آئی آرز رجسٹرڈ ہو چکی ہیں جبکہ34ملزمان کو گرفتار بھی کیا گیاہے، پکڑے جانے والے کنکشنز میں انڈسٹریل10، کمرشل72، زرعی 4اور669ڈومیسٹک تھے۔

تمام کنکشنز منقطع کر کے ان کو777711 یونٹس ڈٹیکشن بل کی مد میں چارج کئے گئے ہیں جن کی مالیت 3 کروڑ74لاکھ 91ہزار 488روپے ہے۔ترجمان کے مطابق بجلی چوروں کے خلاف کئے جانے والے آپریشن میں بڑے زرعی اور کمرشل صارفین بھی بجلی چوری میں ملوث پائے گئے ہیں ان تمام کے کنکشنز بھی منقطع کئے گئے اور ان کو ڈٹیکشن یونٹس چارج کئے گئے ۔

ترجمان کے مطابق شاہ خالد ٹائون فیروز والا میں کمرشل کنکشن کو9270یونٹس چارج کر کے 860000روپے،لدھے کی میں زرعی کنکشن کو15963 یونٹس پر670450روپے، فیروزوالا میں گھریلو کنکشن کو پکڑے جانے پر6050 یونٹس500000روپے،گاندھی پورہ فیروز والا میں ڈائریکٹ سپلائی کو4280یونٹس 469582 روپے کی رقم چارج کی گئی ۔ترجمان کے مطابق لیسکو ریجن میں گیارہ روز کے آپریشن کے دوران کل4451کنکشن چیک کئے گئے،3845کنکشن کے خلاف ایف آئی آر کی درخواستیں جمع کروائی گئیں جن میں سے2730درخواستیں رجسٹرڈ ہو چکی ہیں،کل224ملزمان کو گرفتار کیا گیا ہے،بجلی چوروں کو اب تک9,622,164یونٹس چارج کئے گئے ہیں جن کی رقم40کروڑ 94لاکھ 52ہزار699روپے ہے۔