لاہور( این این آئی)قومی ائیر لائن سمیت نجی ائیر لائنز نے کرایوں میں اچانک بڑا اضافہ کردیا۔کراچی سے اسلام آباد اورلاہور کا یکطرفہ کرایہ دگنا کردیا گیا ۔کراچی سے لاہور اور اسلام آباد کا یک طرفہ کرایہ 17سے بڑھاکر 35ہزار روپے کردیا گیا۔35ہزار والا ٹکٹ 70ہزار روپے کا کردیا گیا جس پر مسافروں میں پریشانی کی لہر دوڑ گئی ۔

نجی ٹی وی کے مطابق پی آئی اے سمیت نجی ایئرلائنز نے کرایوں میں اچانک اضافہ کردیا ، پی آئی اے ،فلائی جناح،ائیربلیو،سرین اور ائیر سیال نے اضافہ کیا۔مسافروں نے مسابقی کمیشن سے نوٹس لینے کا مطالبہ کردیا ہے۔ ذرائع نے بتایا ہے کہ اضافی رش کی وجہ ڈیمانڈ اورسپلائی میں فرق ہے، گرمیوں میں چھٹیاں ختم ہونے کی وجہ سے رش بڑھا ہے، رش معمول پر آتے ہی کرائے معمول پر آجائیں گے۔