خانیوال /اسلام آباد(این این آئی)سربراہ پاک فوج سید عاصم منیر نے کہا ہے کہ فوج عوام سے اور عوام فوج سے ہے ،پاکستان کو موجودہ بحران سے نکال کر دم لیا جائیگا ،پاکستانی غیرت مند ، غیور اور باصلاحیت قوم ہے ،تمام پاکستانیوں نے بھکاری کا کشکول باہر اْٹھاکر پھینکنا ہے، سیکیورٹی اور معیشت کا چولی دامن کا ساتھ ہے ، سیکیورٹی کے بغیر معیشت اور معیشت کے بغیر سیکیورٹی نا گزیر ہے ۔خانیوال ماڈل ایگریکلچر فارم کی افتتاحی تقریب کے موقع پر پاک فوج کے سپاہ سالار نے شرکاء ِ تقریب سے گفتگو کرتے ہوئے کہاکہ پاک فوج کو اپنی قوم کی خدمت کرنے پر فخر ہے۔
آرمی چیف نے کہاکہ فوج عوام سے ہے اور عوام فوج سے،ہم نے فیصلہ کیا ہے کہ پاکستان کو موجودہ بحران سے نکال کر دم لیا جائیگا۔ انہوںنے کہاکہ پاکستانی غیرت مند ، غیور اور باصلاحیت قوم ہے ،تمام پاکستانیوں نے بھکاری کا کشکول باہر اْٹھاکر پھینکنا ہے۔ آرمی چیف نے کہاکہ اللہ تعالیٰ نے پاکستان کو تمام نعمتوں سے نوازا ہے، ہمیں دنیا کی کوئی طاقت ترقی کرنے سے نہیں روک سکتی۔ انہوںنے کہاکہ پاکستان میں زرعی انقلاب آکر رہے گا انشااللہ ۔ سربراہ پاک فوج نے کہاکہ ہم اس ماڈل فارم کی طرز کے جدید فارم بنائیں گے جس سے چھوٹے کسان کو فائدہ ہوگا اور گرین انیشیٹووکا یہ دائرہ کار پورے پاکستان میں پھیلایا جائے گا ۔
انہوںنے کہاکہ ریاست ماں کی طرح ہوتی ہے ، عوام اور ریاست کا رشتہ محبت اور احترام کا ہے ، سیکیورٹی اور معیشت کا چولی دامن کا ساتھ ہے ، سیکیورٹی کے بغیر معیشت اور معیشت کے بغیر سیکیورٹی نا گزیر ہے ۔آرمی چیف نے شرکائِ تقریب کو مخاطب کرتے ہوئے علامہ اقبال کا شعر پڑھ کر ملک و ملت کے ہر فرد کی ملکی ترقی میں اہمیت پر زور دیا ۔آرمی چیف نے علامہ اقبال کا شعر پڑھا کہ ”افراد کے ہاتھوں میں ہے اقوام کی تقدیر،ہر فرد ہے ملت کے مقدر کا ستارہ”۔
