لاہور: ڈالر کے بعد سعودی ریال اور اماراتی درہم کی قیمتوں میں بھی 1 ہی دن میں بہت بڑی کمی ہو گئی ۔ تفصیلات کے مطابق منگل کے روز ڈالر کے علاوہ یورو، پاؤنڈ، اماراتی درہم اور سعودی ریال کی قدر میں بھی کمی ریکارڈ ہوئی ہے۔ سعودی ریال 3.70 روپے کی کمی سے 71.70 روپے کا ہوگیا، جبکہ اماراتی درہم بھی 6.30 روپے کی کمی سے 72.70 روپے کی سطح پر آ گیا۔
اسی طرح پاؤنڈ کی قیمت میں 13 روپے کی کمی سے 355 روپے اور یورو کی قیمت میں 8 روپے کی کمی سے 305 روپے ہو گئی۔ واضح رہے کہ آئی ایم ایف اور پاکستان کے درمیان اسٹاف لیول معاہدہ ہو جانے کے بعد انٹربینک اور اوپن مارکیٹوں میں 2 دنوں میں ڈالر کی قدر میں بہت بڑی کمی ہوئی ہے۔ منگل کو عید کے بعد پہلے کاروباری روز کے روز ڈالر کے انٹربینک نرخ مزید 10 روپے 55 پیسے کم ہوگئے۔
کاروباری روز کے اختتام پر ڈالر کی انٹربینک قیمت 275.44 پر آگئی۔ جبکہ اوپن مارکیٹ میں بھی ڈالر کی قدر مسلسل گر رہی ہے، دو روز میں امریکی کرنسی کی قیمت میں مجموعی طور پر 11 روپے کمی ہوئی جس کے بعد منگل کو مارکیٹ بند ہونے پر اوپن مارکیٹ میں ڈالر کی قیمت 279 روپے پر پہنچ گئی۔
