اسلام آباد (این این آئی)وفاقی وزیر خزانہ سینیٹر اسحاق ڈار نے پیٹرولیم مصنوعات کی نئی قیمتوں کا اعلان کردیا ہے تاہم اس میں مٹی کے تیل اور لائٹ ڈیزل کی نئی قیمت شامل نہیں اس حوالے سے پیٹرولیم ڈویژن کے حکام نے بتایاکہ مٹی کے تیل اور لائٹ ڈیزل کی نئی قیمت کا اعلان ابھی نہیں کیا گیا
اس کا اعلان (آج) اتوار تک متوقع ہے۔رات گئے پریس کانفرنس کرتے ہوئے اسحاق ڈار نے کہا تھا کہ پیٹرول کی قیمت میں کسی قسم کا اضافہ نہیں کیا جا رہا، پیٹرول کی قیمت برقرار رہے گی جبکہ عالمی منڈی میں تیل کی قیمت میں کافی اضافہ ہوا ہے اس لیے ڈیزل کی قیمت میں ساڑھے 7 روپے کا اضافہ کیا جا رہا ہے۔ پیٹرولیم ڈویژن کے حکام کے مطابق پیٹرول پر لیوی 5 روپے اضافے سے 55 روپے ہوگئی ہے ، ڈیزل پر لیوی 50 روپے فی لیٹر برقرار رہیگی۔ خیال رہے کہ پاکستان اور آئی ایم ایف کے درمیان معاہدہ طے پاگیا ہے اور معاہدیکی شرائط کے تحت بجلی مزید مہنگی ہونے کا خدشہ ہے۔
