اسلام آباد (این این آئی) پی آئی اے کا برطانیہ کے لئے فلائٹ آپریشن بحال کر نے کے لئے متبادل انتظامات ترتیب دے دئیے ، پی ائی اے اور پرتگالی فضائی کمپنی کے مابین معاہدہ طے پاگیا ، تین سو سے زائد نشستوں والے جدید ائیر بس 330 A طیارے کے ذریعے پروازیں چلائی جائیں گی۔ ترجمان پی آئی عبد اللہ خان کے مطابق برطانیہ آپریشن میں پی آئی اے کے
سلاٹ اور کال سائن استعمال ہوگا ، ائیر بس 330 میں اکنامی اور بزنس کلاس میں جدید اور آرام دہ نشستیں ہیں۔ ترجمان کے مطابق طیارے میں سماجی فاصلے کا خیال رکھا جائے گا ، پی آئی اے 14 اگست کو برطانیہ سے آپریشن شروع کرے گی۔ ترجمان کے مطابق پرواز پی کے 9702 PK مانچسٹر سے 250 سے زائد مسافروں کو لیکر اسلام آباد روانہ ہو گی ، 15 اگست کو پرواز پی کے 9785 اسلام آباد سے لندن کے لئے روانہ ہو گی۔ترجمان پی آئی اے کے مطابق ان براہ راست پروازوں پر بکنگ کا آغاز ہوگیا ہے اور پہلے پرواز ابھی سے پر ہوگئی ہے ۔ترجمان پی آئی اے کے مطابق پی ائی اے کے پاس اعلی سروس کے ساتھ محدود تعداد میں نشستیں موجود ہیں جن کی بکنگ جاری ہے ، پی ائی اے ان پروازوں پر 45 کلو فی مسافر بیگج کو سہولت بھی مہیا کررہا ہے۔ترجمان کے مطابق پی آئی اے کے مسافروں کو دوران پرواز ان فلائٹ انٹرٹینمنٹ کی سہولت بھی میسر ہو گی ، پی ائی اے کو درخواستیں موصول ہوئی ہیں کہ مانچسٹر سے زیادہ سے زیادہ پروازیں چلائی جائیں ۔ترجمان پی آئی اے کے مطابق پی آئی اے کی پروازوں کی معطلی کے بعد دیگر ائیرلائنز نے کرائے غیر معمولی طور پر بڑھا دئیے تھے، پی آئی اے کی پروازوں کے چلنے کے بعد کرائے واپس عام سطح پر آنا متوقع ہے ۔
