اسلام آباد (این این آئی) وزارت خزانہ نے کہا ہے کہ جولائی،دسمبر2019ء کے عرصے میں غیر ملکی قرضوں کی مد میں 5.5 ارب ڈالر کی رقومات موصول ہوئیں اسی عرصہ کے دوران3.8 ارب ڈالرکا غیر ملکی قرضہ واپس کیا گیا۔
وزارت خزانہ کے مطابق اس عرصہ میں خالص حاصل شدہ غیر ملکی قرضہ 1.7 ارب ڈالر رہا اور مجموعی غیر ملکی قرضہ کے حجم میں بھی1.7 ارب ڈالر کا اضافہ ہوا۔وزارت خزانہ کے مطابق حکومت پاکستان کو جولائی دسمبر2019ء کے عرصے میں دو طرفہ اور کثیر فریقی مدوں میں غیر ملکی قرضوں کی رقومات موصول ہوئیں۔ وزارت خزانہ کے مطابق جولائی دسمبر2019 کے عرصے میں یوروبانڈ اور کمرشل قرضہ جات واپس کیے گئے۔ وزارت خزانہ کے مطابق جولائی دسمبر2019ء کے عرصے میں مجموعی وصول شدہ بیرونی قرضوں میں پچھلے سال کے اسی عرصے کی نسبت بعض اخبارات میں بیان کردہ156 فیصد کی بجائے31 فیصد اضافہ ہوا۔وزارت خزانہ کے مطابق مالی سال2018-19کے دوران مجموعی غیر ملکی قرضوں کا حجم10.5 ارب ڈالر تھا۔وزارت کے اعلامیہ کے مطابق حکومت نے گذشتہ مالی سال کے دوران7.4 ارب ڈالر قرض واپس کیا جس سے بیرونی ملکی قرضے میں 3.1 ارب ڈالر کا خالص اضافہ ہوا۔
