کراچی(آن لائن)مالی سال 2018-19کے دوران بیرون ملک مقیم پاکستانی کارکنوں نے 21.84 ارب ڈالر کی ترسیلات بھیجیں۔بیرون ملک مقیم پاکستانی کارکنوں نے مالی سال 2018-19کے دوران21841.50 ملین امریکی ڈالر وطن بھجوائے جو گذشتہ برس کے دوران موصول ہونے والے19913.55 ملین ڈالر کے مقابلے میں 9.68 فیصد نمو کو ظاہر کرتا ہے۔جون 2019 میں کارکنوں کی ترسیلات زر کی مالیت 1650.52ملین ڈالر رہیں جو مئی 2019 کے مقابلے میں 28.72 فیصد کم جبکہ جون 2018 کے مقابلے میں1.40 فیصد زائد ہے۔بلحاظ ملک جون 2019کی تفصیلات سے پتا چلتا ہے کہ سعودی عرب، متحدہ عرب امارات، امریکا، برطانیہ، خلیج تعاون کونسل کے ملکوں
(بشمول بحرین، کویت، قطر اور عمان) اور یورپی یونین کے ملکوں سے بالترتیب334 ملین ڈالر،356.03 ملین ڈالر،276.76ملین ڈالر،268.97ملین ڈالر، 163.46 ملین ڈالر، اور52.49 ملین ڈالر پاکستان بھجوائے گئے جبکہ جون 2018 میں ان ملکوں سے آنے والی رقوم بالترتیب 336.61ملین ڈالر،345.31 ملین ڈالر، 260.32ملین ڈالر،260.25ملین ڈالر، 163.53 ملین ڈالر اور 62.16 ملین ڈالر تھیں۔جون 2019 میں ملائشیا، ناروے، سوئٹزر لینڈ،آسٹریلیا، کینیڈا، جاپان اور دیگر ملکوں سے آنے والی ترسیلات زر مجموعی طور پر198.81 ملین ڈالر رہیں جبکہ جون 2018 میں ان ملکوں سے 199.47 ملین ڈالر موصول ہوئے تھے۔