کراچی(این این آئی)گزشتہ ہفتے کے دوروان مہنگائی کی شرح میں معمولی کمی ریکارڈ کیاگئی،جون کے تیسرے ہفتے کے دوران مہنگائی کی شرح میں0.09 فیصدجبکہ کم آمدنی والے طبقے کے لئے قیمتوں کے حساس اشاریئے میں 0.08 فیصد کمی ریکار ڈ کی گئی۔پاکستان بیور و شماریات کے اعداد و شمار کے مطابق 21 جون کو ختم ہونے والے ہفتے کے دوران سگریٹ،لہسن ،گندم، آٹا ،روٹی سادہ ، دال مونگ ، دال ماش، دال مسور ، چنے کی دال ،خوردنی تیل، گڑ، بیف،مٹن، انڈے، سرخ مرچ، تازہ دودھ ، دھی، باسمتی چاول،آلو،ویجی ٹیبل گھی ،سمیت 21 اشیائے ضروریہ کی قیمتوں میں اضافہ ہوا ۔

زندہ مرغی، پیاز ،کیلے، ٹماٹر،چینی ،ایل پی جی ،اری چاول ،سمیت 7اشیائے ضروریہ کی قیمتوں میں کمی ریکارڈ کی گئی، ادارہ شماریات کے مطابق پیٹرول ، ہائی سپیڈ ڈیزل، مٹی کاتیل ،گیس نرخ ، بجلی کے نرخ ،چائے، مسٹرڈ آئل ،ملک پاڈر،نمک ،صابن ، سمیت 25 اشیائے کی قیمتوں میں استحکام رہا۔ادارہ شماریات کے مطابق گزشتہ ہفتہ کے مقابلے میں آٹھ ہزار تا بارہ ہزار آمدنی ، بارہ ہزار تا اٹھارہ ہزارآمدنی ، اٹھارہ ہزار تا پینتیس ہزار تک اور پینتیس ہزار روپے سے زائد آمدنی والے افراد کے گروپوں کیلئے قیمتوں کے حساس اعشاریے میں بالترتیب 0.13، 0.13 ،0.11 اور 0.04 فیصدکمی ریکارڈ کی گئی۔