لاہور( این این آئی)پرائس کنٹرول کمیٹی کے سابق چیئرمین میاں عثمان نے کہا ہے کہ رمضان المبارک میں اشیائے خوردونوش کی سرکاری ریٹ لسٹ کے مطابق فروخت یقینی بنانے کیلئے تھوک مارکیٹوں اور ہول سیلرز کی مانیٹرنگ کو یقینی بنانا ہوگا، رمضان المبارک میں سبزیوں،پھلوں ،چکن ، گوشت اور اشیائے خوردونوش کی طلب کے مطابق رسد کو یقینی بنانے کیلئے متعلقہ

ایسوسی ایشنز سے پیشگی ملاقاتیں کی جائیں ۔ اپنے ایک بیان میں انہوں نے کہا کہ حکومت کی جانب سے رمضان المبارک میں عوام کو ریلیف دینے کیلئے رمضان بازاروں، فیئر پرائس شاپس اور پرچون دکانداروں کے لئے کسی طرح کی پالیسی کا اعلان نہیں کیا گیا جو تشویش کا باعث ہے ۔ گراں فروشوں کے خلاف بھی پیشگی مہم کا آغاز کیا جانا چاہیے تاکہ انہیں رمضان المبارک میں کنٹرول کیا جا سکے لیکن اس جانب بھی کوئی پیشرفت نہیں دیکھی جارہی ۔ انہوں نے کہا کہ صرف سرکاری ریٹ لسٹ جاری ہونے سے عوام کو مقررہ نرخوں پر اشیائے خورد و نوش کی فراہمی یقینی نہیں بنا ئی جا سکتی اس کیلئے حکومت تھوک مارکیٹوں اور ہول سیلرز کی مانیٹرنگ کو یقینی بنائے اور زمینی حقائق کے مطابق ریٹ لسٹ جاری کی جائے ۔ا نہوں نے کہا کہ رمضان المبارک میں سب سے زیادہ پھلوں اورسبزیوں کی فروخت میں گراں فروشی ہوتی ہے اس لئے حکومت سب سے پہلے وافر مقدار میں سپلائی کو یقینی بنانے کیلئے اقدامات کا آغاز کرے تاکہ عوام کو گراں فروشوں کے استحصال سے بچایا جا سکے۔

موضوعات:پرائس کنٹرول کمیٹی