لاہور( این این آئی )آل پاکستان انجمن تاجران کے صدر اشرف بھٹی نے کہا ہے کہ حکومت ایف بی آر کی جانب سے چھاپے مار کر ہراساں کرنے کے سلسلے کو فی الفور بند کرائے ،23جنوری کو بجٹ میں ود ہولڈنگ ٹیکس کے مکمل خاتمے کا اعلان کیا جائے ، اعلان کے باوجود انار کلی سمیت

دیگر تجارتی مراکز میں پارکنگ پلازوں کی تعمیر میں پیشرفت نہ ہونے پر تاجروں میں تشویش پائی جاتی ہے ۔ان خیالات کا اظہارا نہوں نے اپنے دفتر میں ہنگامی اجلاس میں خطاب کرتے ہوئے کیا ۔ اس موقع پر مختلف مارکیٹوں کے تاجر نمائندے بھی موجود تھے ۔ اشرف بھٹی نے کہا کہ ٹیکس دینے والوں کو شک کی نگاہ کی دیکھنے کی پالیسی خود حکومت کیلئے سود مند نہیں۔ کسی بھی مارکیٹ میں چھاپے سے قبل متعلقہ ایسوسی ایشن او ریونین کے عہدیداروں کو اعتماد میں لیا جائے ۔ انہوں نے کہا کہ حکومت کو پیشکش کر چکے ہیں کہ ہم مارکیٹوں کا سروے کرانے کیلئے تیار ہیں لیکن پہلے حکومت اپنی پالیسی واضح کرے ،چھوٹے تاجروں کیلئے فکس ٹیکس کا نظام لائے۔ اشرف بھٹی نے کہا کہ ہم امید کرتے ہیں کہ 23جنوری کے بجٹ میں ٹیکس دینے والوں پر مزید بوجھ نہیں ڈالا جائے گا اور حکومت ود ہولڈنگ ٹیکس کے مکمل خاتمے کا اعلان بھی کر ے گی ۔ اشرف بھٹی نے کہا کہ انار کلی سمیت دیگر تجارتی مراکز میں پارکنگ کے مسائل کی وجہ سے کاروبار تباہ ہو گیا ہے لیکن مطالبات کے باوجود کوئی شنوائی نہیں ہو رہی ۔