اسلام آباد( آن لائن )عید الفطر پر صارفین کو نئے کرنسی نوٹوں کی فراہمی کے لئے سٹیٹ بینک آف پاکستان کی جانب سے شروع کی گئی ایس ایم ایس سروس کے ذریعے چار روز میں 85 فیصد بکنگ کرائی گئی ہے۔چار روز کے دوران 2.3 ملین صارفین نے نئے کرنسی نوٹوں کے لئے اپلائی کیا ۔رواں سال صارفین کو نئے کرنسی نوٹ فراہم کرنے کے لئے ملک کے 132 شہروں /قصبوں میں 1535 برانچز کے ذریعے ادائیگی کی جائے گی جبکہ گزشتہ عیدالفطر

کے موقع پر سٹیٹ بینک آف پاکستان کی جانب سے 120 شہروں / قصبوں میں 1018 مین برانچز کے ذریعے صارفین کو نئے نوٹ جاری کئے گئے تھے۔ گزشتہ سال عید الفطر کے موقع پر 1.8 ملین صارفین کو نئے کرنسی نوٹ فراہم کئے گئے تھے جبکہ رواں سال عیدالفطر کے لئے نئے کرنسی نوٹوں کے اجرا کے لئے صارفین کی تعداد میں 50 فیصد اضافہ کیا گیا ہے اور 2.7 ملین صارفین کو ایس ایم ایس سروس کے ذریعے نئے کرنسی نوٹ جاری کئے جائیں گے۔