لاہور( این این آئی )ملک کے مختلف علاقوں میں بارشوں اوربرفباری سے سردی کی شدت میں اضافے کے نتیجے میں گیس کا بحران پیدا ہوگیا ، مختلف علاقوں میں گیس پریشر نہ ہونے سے عوام شدید مشکلات سے دوچار ہو گئے ، غیر قانونی کمپریسر کا استعمال بھی بڑھ گیا ۔ تفصیلات کے مطابق لاہور سمیت پنجاب کے مختلف علاقوں میں بارشوں اور شمالی علاقہ جات میں برف باری کے بعد
سردی کی شدت میں اچانک کئی گنا اضافہ ہو گیا ہے جس سے گیس کا استعمال بھی بڑھ گیا ۔دوسری طرف گیس کا پریشر نہ ہونے کے باعث لوگوں کو شدید مشکلات درپیش ہیں۔ صوبائی دارالحکومت لاہور سمیت پنجاب کے کئی علاقوں میں گیس کا پریشر کم ہونے کی وجہ سے خواتین کو گھریلو امور کی انجام دہی میں مشکلات کا سامنا ہے ۔ کئی علاقوں میں چولہوں میں آنے والی گیس شعلہ سے زیادہ نہیں ۔ دوسری طرف کئی علاقوں میں صارفین نے غیر قانونی کمپریسر کا استعمال بھی شروع کر رکھا ہے جس سے اردگرد کے رہائشی پریشانی میں مبتلا ہیں۔ محکمہ سوئی گیس کے ترجمان نے اپنے بیان میں کہا ہے کہ عوام موسم سرما میں گیس کا احتیاط سے استعمال کریں ، ہیٹر کا استعمال کرنے کی بجائے گرم کپڑوں کا استعمال کیا جائے ، گیزر کے استعمال کے لئے محکمہ سوئی گیس کی جانب سے دی جانے والی ہدایات پرعمل کیا جائے ،کھانا بنانے کے بعد چولہے کو مکمل طور پر بند کر دیا جائے تاکہ دوسرے صارفین بھی اس سہولت سے استفادہ کر سکیں۔واضح رہے کہ دو دن قبل ہی حکومت نے ملک میں بجلی اور گیس کی لوڈشیڈنگ کے خاتمے کا اعلان کیاتھا۔
