اسلام آباد (آئی این پی)ایف پی سی سی آئی کی ریجنل کمیٹی برائے صنعت کے چئیرمین عاطف اکرام شیخ نے کہا ہے ملک کی سیاسی فضاء بہتر ہو رہی ہے جسکی وجہ سے کاروباری سرگرمیاں بحال ہو رہی ہیں۔ گزشتہ کئی ماہ سے بے یقینی اورخوف کی کیفیت میں رہنے والے سرمایہ کاروں سے میں کئی اپنے خول سے باہر نکل آئے ہیں جو خوش آئند ہے۔ وزیر اعظم شاہد خاقان عباسی سیاسی و معاشی استحکام کو اپنی ترجیحات میں شامل کریں۔ عاطف اکرام شیخ نے یہاں جاری ہونے والے ایک بیان میں کہا کہ
وزیر اعظم شاہد خاقان عباسی نے اپنی پہلی تقریر میں سی پیک پر کام کی رفتار بڑھانے کے عزم کا اظہار کیا ہے جو خوش آئند ہے۔ ملک کی سیاسی اور فوجی قیادت سی پیک کے معاملہ میں ایک ہی صحفہ پر ہیں جبکہ چین نے غیر جانبداری کا مظاہرہ کرتے ہوئے پاکستان کے اندرونی معاملات کے اس منصوبہ پر اثر انداز ہونے کے تاثر کو بروقت زائل کر دیا ہے جس سے اس منصوبہ کی بروقت تکمیل یقینی نظر آ رہی ہے۔ انھوں نے کہا کہ سیاسی عدم استحکام کی وجہ سے سی پیک پر جاری منصوبوں اور ان منصوبوں پر جو ابھی منصوبہ بندی کے مرحلے میں تھے معمولی اثر پڑا ہے مگر اسے نظر انداز کیا جا سکتا ہے۔ عاطف اکرام شیخ نے کہا کہ سی پیک کی بروقت تکمیل کیلئے چین اور پاکستان کا ایک صحفے پر ہوناکافی نہیں ہے بلکہ اسکی سیکورٹی جو فوج کی ذمہ داری ہے اور اس سے بڑھ کر سرمایہ کاری کے ماحول کو بہتر بنانا ضروری ہے جو سویلین حکومت کی ذمہ داری ہے۔ سی پیک پر بنائے جانے والے نو خصوصی اقتصادی زونز کی کامیابی کیلئے پاکستان کی نجی شعبہ کی ان میں شمولیت ضروری ہے جسکے لئے انکے بعض خدشات دور کرنا ہونگے۔
